Hadien wa dep lai u Prime Minister ka ri, u Narendra Modi cha Lakshadweep kawa man leh kam ka Union Territory ka India yow lai wai ya kiwa boon ki kaam pynroi, da mih i beiñ yeini da kawi na ki Minister ka ri Maldives kawa em hajan ka Lakshadweep.
Ka Mariyam Shiuna kawa man kam ka Deputy Minister of Youth Empowerment, Information and Arts ka ri Maldives hadien wa mih ki dur u Modi wa lai u cha rood duriaw wei da lai yimpa u hapoh duriaw, neiliang yong ka da thoh ko deiwa ong “What a clown. The puppet of Israel Mr. Narendra diver with life jacket” wei yeini da ong ko hadien wa ka India da pteiñ ko yei yatoh lok waka Israel hadien wa sdang ka thma pyrchah wa ki Hamas.
U Modi ha ka 4 tarik uni u bnai da lai u cha Lakshadweep wei da booh u leh ki dur ki dar wa pynyoo yei miat kani ka thaw kamjooh da yaroh u yei miat ki Beach kani ka thaw.
Neiliang kiwa chong chnong ka India da pynyoo ki yei pyrchah yeini wa klam kani ka Montri ka Maldives deiwa pyndam ya palat 8,000 tylli ki Hotel Booking wa 2,500 tylli ki Ticket lieñsuiñ wa da dep thied ki yow lai cha Maldives.
Iwa da pynphylla ya kiwa boon toh wa u Modi hawa e u yei klam ym em ong u iyi iyi leh chaphang ka Maldives tangwa kani ka Montri ka Maldives won da beiñ ka oo khlem daw.
I beiñ ya kani ka Montri da mih leh na u President warim ka Maldives u Mohamed Nasheed uwa da ong wym ye u mutdur wa kam ka bru wa heh kyrdan da pynemkaam ko kam kini ki kyntien.
Neiliang ki bru wa pawnaam ka ri kam u Akshay Kumar, u John Abraham wa u Sachin Tendulkar da pynchlur ki ya ki paidbah wow lai Lakshadweep heiwa u Akshay da ong u yow krum u lai cha Maldives kiwa em mynsien wow kynchiñ ya ki nong India.
Ynne won ki Website u President ka Maldives, ka Website ka Foreign Ministry wa Tourism Ministry toh ki wym ye de u wai wa da suba toh wa da chah Hack ki.
Discussion about this post