I yaklam wow che noh hajrong i dawa Inner Line Permit (ILP) ha ka jylla Meghalaya yoodur kattu dang slem ko neibhah wa hadooh katni ympu tip mynnu u wan u Montri Kaam Pohyung ka ri India, u Amit Shah wow yooh kjat biang ha nongbah Shillong kamwa da pyntip da u Montri Rangbah ka jylla, u Conrad Kongal Sangma ha u Thohlakhmi.
Kam wow pynkynmoo heini, u Amit Shah da wan u ha Shillong ha ka 23 Duyatra neibynta ka Plenary Meeting yong ka NEC, wei ha kani ka sngi ym em u klam u wa kiwon kiwon ki seiñ heiyatoh wa ka ILP tangwa u Conrad K Sangma da pyntip u wa u Amit Shah da khut yaklam u ya ka sorkar wa ya ki seiñbhalang cha Delhi wow yaklam yillu bha hajrong ka ILP ha Meghalaya.
Ha u Thohlakhmi u Montri Rangbah ka jylla, da ong u wa u Amit Shah daw wan biang u cha nongbah Shillong ha u Wisu heiwa daw sah u 2 sngi wow yachem lut ya kiwa kitkaam wow yaklam hajrong ka ILP, tangwa kamwa man katni da jan kut u Wisu tangwa ympu yoh wyrta mynnu u wan uni u Montri ka sorkar pyrdi.
Hawa kylli hajrong ini na u MLA ka BJP, u Alexander Laloo Hek da ong u wa ympu tip iwon iwon hajrong i wan u Amit Shah, deiwa pynrap wa boi da em i yaklam wa u Montri Rangbah ka jylla, tangwa wa ka Party ympu em iwon iwon i yaklam wow wan u cheini.
