Beiñ ka Synjuk Waheh Chnong East Jaiñtia yei e Certificate u Waheh Chnong ka Thangskai ya u baar jylla

Ka Synjuk Waheh Chnong East Jaiñtia Hills District, dei sñiawkhia wa joor, ha ka yalang Executive Committee yong ka, da kawi ka sur da rai ko wow beiñ joor hajrong i nood yong u Waheh Chnong ka Thangskai, East Jaiñtia Hills wow e Certificate kam uwa chong chnong wa pura ya uwi u baar jylla, kat hadooh wa katai ka Certificate da ktah haroh ko wot ya ka bhah puræ doctor yong ki bru u Ynñiaw Trep Ynñiaw Wasa yong i.

“Ini i leh yong uni u waheh chnong ka Thangskai najrong wa da tooh chwa ko ya ka bhah puræ Doctor yong ki khon yong i, kani daw ktah joor haroh ko ya ka ri ka muluk wa ya ka jaitbru khian paaid yong i hadien habood. Katwa kamtea, ka SWS-East Jaiñtia Hills District da beiñ joor ko yeini,” ong u Hambertus Nongtdu, President yong ka SWS-EJHD.

U President da ong u leh wa najrong itai i chah ktah yong ka jaitbru yong i, ini i leh yong utai u waheh chnong da wanrah haroh ka yei dooh burom wei i dooh chaniah yong kiwi tawon ki waheh chnong yong ka East Jaiñtia Hills District. Kamtæ ka synjuk da dawa joor ko na ka Dorbar Chnong Thangskai wa kynthup wa na ki bor sorkar wa na ka JHADC wow pyndooh pyndam noh chisyndon ya katai ka Certificate wa da e kulmar cha utai u baar jylla.

Ka kyrwoh na ka synjuk da ong haroh ko wa hajrong ini wa jia wym sñiawsuk na Thangskai iwa da booh hei eh i khoo wei hei maa ya ka jaitbru tre ri yong i, ka SWS-EJHD lyngba yong uni u kyrwoh, da rai haroh ko wow kyntu wei wow pynkynmoo ya waroh ki dorbar chnong wa ki waheh chong yong ka East Jaiñtia Hills District wow hap ki u man kiwa husiar bha heiyatoh wa i e ya ki jait Certificate waphær waphær khnang wa kani ka kaam yow dam ko u booh hei eh næ i maa ya ka jaitbru khian paaid yong i hadien habood.

Related posts

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Heijooh i por, ka synjuk kyntu haroh ko ya ki bor sorkar wa kiwi kiwi ki bor wow sñiawbha ki wow sylli wei bichaar bniah bha ya ki Certificate waphær waphær kiwa mih na ki dorbar chnong wei wow pyntip ki wut wut cha ki dorbar chnong lada chem ya kiwon kiwon ki jait Certificate kiwa yoo ki kiwa yoo suba.

Heijooh i por leh, ka synjuk ha kani ka yalang ka Executive Committee neibynta ka yap ka im yong ka jaitbru tre ri tre muluk yong i, da pyrkhat sani bha ko katkam wa man kattæ heiwa lada toh iwa ye u leh, yow chna noh du kawi don hi ka dur ka dar (Format) neibynta yong ki Certificate waphær waphær neibynta i pynemkaam yong waroh ki chnong kiwa wa em ha East Jaiñtia Hills District.

Katkam wa man kattea, kani ka bynta dang em ko hapoh i pait i sylli wa sani bha yong ka SWS-East Jaintia Hills District, pynkut u kyrwoh na ka SWS-East Jaintia Hills District.