Shillong: U CEM ka KHADC, u HS Shylla da pynbaad u wa u symbood montri rangbah ka jylla, u Prestone Tynsong da klam kulmar u khlem sñiawthooh neibhah wa da kam u wa ka NPP daw pynkrehkaam ko ya ka Village Administration Bill (VAB).
U Shylla da ong u wa i klam u Prestone wow pynkrehkaam ya ka VAB, toh kawa khlem yurim neibhah wa ki Hima, ki Elaka da em chwa ki riti dustur kiwa da pynskem da ka Council wei lada wanrah sa ka VAB, daw yatyngkhooh ko wa ki aiñ riti dustur yong ki Hima, ki Elaka.
Heijooh i por da ong u wa wot u montri rangbah ka jylla, u Conrad K Sangma da sñiawthooh u yei emkaam ya ka Inner Line Permit (ILP), heiwa dang ini da ong u wa ka Entry wa Exit Point toh ka yung katwa ka ILP man ko ka tiar.
U Shylla da ong u leh wa ya ka jaitbru ye u yada du da ka ILP wa ka Khasi Social Lineage Custom (2nd Amendment) Bill, ka Clan Bill kiwa dang sahteiñ ha ka sorkar hadooh katni.
Ha iwi won i liang da ong u wa i pynkhreh wow lai ujor cha ka Supreme Court pyrchah ya ka sorkar jylla kawa da yoobeiñ ya ki District Council deiwa kyntait u pdiang ya ka ILP.
Heijooh i por u Shylla da kitbok u ya ki MDC wow yoh biang ki yei jop deiwa pynbna leh wa ym yakhun de u ya ka Election.
Discussion about this post