Beiñ u Lat ka Nagaland wa Tamil Nadu ya u heh ka DMK uwa ong waroh ki Naga toh kiwa baam doh ksaw

I klam u Organising Secretary ka DMK Party, u R.S. Bharathi heiyatoh wa ki jait baam wa baam ki bru ha Nagaland da pynkhih win ko yaka jylla Tamil Nadu heiwa da mih i beiñ na u Lat ka Tamil Nadu, u R.N. Ravi wa na u Lat ka Nagaland, u La Ganesan.

U Bharati hawa e yei klam ha kawi ka yalang ha Tamil Nadu da ong u wa u R.N. Ravi kam u Lat kwah u du wow pynthut ya ka DMK kam kawa synchaar hapoh ka jylla deiwa dam chynnam u wow e yaka muhor ya ki aiñ wa da mynjur da ka sorkar hapoh ka Legislative Assembly.

Hawa e yei klam da ong u, “Tip hi phi yi jia ya u Ravi heipor wa man u kam u Lat ha Nagaland wei iyi i daw wa chah beh u. Ham sñiawthooh bakla nga, ini ong O du kam ka nongmuna. Ki bru ka Nagaland toh kiwa baam doh ksaw. Lada kitu kiwa baam doh ksaw ye ki wow sñiawkhia hadooh wow beh ya u Lat, pyrkhat kammon u sñiaw kiwa wa baam dei ja wa i blooh. U Ravi ymtoh u mylliñ u yeini.”

Da pynbaad u leh wa haka sngi wa mih u Ravi na Nagaland, ki paidbah da lehkmen ki deiwa beiñ leh ya u Lat yei wym bien u wow mynjur yei rai ka Madurai Kamaraj University wow pynkup burom da ka Honorary Doctorate ya uwa yaleh laitlooid yaka ri kamjooh u dkhot warim ka Communist, u N. Sankaraiah.

Related posts

Ya ka Election cha GHADC daw pynbna hadien ka Delimitation

April 15, 2026

Baam smai u Samrat Choudhary kam u CM wa thymme ka Bihar

April 15, 2026

Neiliang u Ravi da ong u wa ini i rukom klam u Bharathi da ktah ko yei sñiaw ki Naga waroh deiwa ong wa ki Naga toh ki bru wa chlur, kiwa em burom wa kiwa khooid wei ini i rukom klam toh wow yoobeiñ deiwa khut ya ki kam kiwa baam doh ksaw wei ym ye u pdiang yeini.

U Lat ka Nagaland hawa e yei jubab yeini wa klam u heh ka DMK da ong u wa toh iwa bakla wow ong naphang waroh ki Naga toh kiwa baam doh ksaw iwa da khlem pyrkhat yei dustur i riti yong jar jiar ki jaitbru ri-loom wa boon wa em ha Nagaland.

Da ong u leh wa ini i rukom klam toh iwa daw yah bakla wei wow yoo beiñ ya ki bru du na ki jait baam wa baam ki neibhah ki baam wa baam ki bru toh chong hei mon yong ki. Deiwa e nongmuna wa ki Naga da im ki dei suk wa ki Tamil la ha Nagaland næ ha Tami Nadu nadooh kiwa lai puræ wa kiwa lai kreh.

Da beiñ u leh yei rukom chah klam u R.N. Ravi deiwa pynbaad wa chah beh u na Nagaland iwa man du i thok suda neibhah ki Naga burom bha ki ya oo.

Kamtæ da kyntu u ya waroh wym toh u myllien ki wow klam kam kini ki jait ktien tangwa wow pynchlur u tip wow burom uwi ya uwi wei wow wanrah yei yatylli khamtam kitu kiwa man kam kiwa yahkhmat.

Da kyntu u leh ya kiwa chong chnong ka Nagaland wym toh u ap yeini i klam uwa yahkhmat ka DMK neibhah oo ymtoh i sur yong ki bru Tamil.