Shillong: U Montri Rangbahdooh ka ri, u Narendra Modi ynne hawa wan yoohkjat ha kawa ar sien ha ka jylla, da yaroh u ya ka jylla Meghalaya wei da ong u wa ka BJP ngait ko u wanrah yei kylla, wei ka sorkar daw pynbiang chooh chooh ko ya ki sarok ki wow pynyaryngkat ya ka Meghalaya wa kiwi ki jylla ka thaiñ mihsngi.
Ini i wan u Modi cha ka jylla toh wada jan ka Election MLA ha u snem 2018.
Hawa klam ha ka rally BJP ynne ka sngi ha madan Polo u Modi da ong u wa ka thong yong ka sorkar India toh wow wanrah yei roi i paar hapoh ka thaiñ mihsngi.
Da ong u wa ka sorkar India da pynlut ko hadooh T. 14,000 klur ha ki le snem wa da dep neibynta ki kaam pynroi ha ka thaiñ waroh kawi wei T. 60,000 klur da mang ko wow pynlut ha kini ki ar snem wow wan.
Da ong u wa u sarok Shillong-Nongstoin-Tura wa da e poisa ka sorkar T. 2,300 klur daw kynrong kyntu ko ya roi i paar ka jylla wei daw e ko leh chiboon i myntoi ya ki paidbah la ha ka lai ka wan deiwa e nongmuna leh kiwi ki kaam kiwa da leh ko hapoh ka jylla Meghalaya.
U Modi da kular u wow wanrah wa ka Shillong Airport deiwa sdang wow pynheh ya ka hei lut kamwa T. 180 klur wei daw pyndep ya ka ha kini ki chi snem chiteiñ.
Chooh chooh u Modi da pynsñiaw u wa ka sorkar daw yarap ko wow kyntu ya ki kaam uiñke suwari ha kani ka jylla wei neibynta ini ka sorkar da mang ko hadooh T. 100 klur.
Ha iwi i liang u Montri Rangbahdooh da beiñ joor u ya ka sorkar Congress ha ka jylla wa man ko kawa baam-tooh dooh kawa boon du ki Scam.
Da ong u wa ha kini ki 15 snem wa da lai hapoh i synchaar ka Congress ym em iwon iwon i kaam pynroi la hei chait i khiah, i puræ puthi, ki luti syngkieñ, ka um baam wa kiwi kiwi.
Chooh chooh da ong u wa u Montri Rangbah ka jylla, u Dr. Mukul Sangma toh u Doctor wei tip bha u yeiwa emkaam ha i chait i khiah tangwa ki thaw sumaar hapoh ka jylla man ki kiwa dang boon i duna.
Da ong u wa katkam ka CAG Report yong u snem 2015-16 ka jylla Meghalaya da dooh yarap poisa ko hadooh T. 908 klur wa da mang neibynta ka puræ puthi na ka sorkar India, wei ini i dooh toh neidaw wa ha ki 6 snem ka sorkar jylla ym em u pynemkaam ko ya ka scheme wa da e da ka sorkar India.
Chwa ini u Modi da wai paidbah u leh ya u sarok 2 lane wa pynyabi ya ka Shillong, Nongstoin wa Tura hei sakhi ki paidbah wa poi cha kani ka rally.
Discussion about this post