March 25, 2020
0 Comments
Shillong: U Prestone Tynsong uwa man leh u symbood montri rangbah ka jylla da ong u wa i pynkrehkaam ya ka Curfew ha nongbah Shillong toh wa ka sorkar kwah ko wa ki paidbah u chong bait ki ha ki jar jiar ki yung ki sem ha kam kini ki por wow yada nei poi u khñiang Coronavirus næ u COVID-19.
Da ong u wa i pynkrehkaam yaka Curfew toh yow lait u em wa yaleh pyrchah, wei lada em kiwa tyngkheiñ ya ka hukum yong ka sorkar daw kset ha patok neibhah wa bha u kset ya kiwa yaleh pyrchah bar yow yap ka jaitbru wa ki paidbah ka jylla.
Da ong u wa ka jylla man ko kawa da kyrkhu da u Blai wa hadooh katni ym pu em kiwa yoh ya uni u khñiang wei katni emkaam wow syndong wei wow yada neibhah lada wan jia, ym myntoi de wow yaklam, deiwa pynrap wa man kawa emkaam wow kdoh u khoom chwa katni yow lait u jia.
Chooh chooh da ong wa ka sorkar ka chimkhia ko wow lai deilang wa ka sorkar pyrdi ha ini i khang chnong khnang wa ki paidbah u chong bait ki ha ki yung ki yow lait naka khlam wa chyrkhei, neibhah ini man ko ka kaam yap kaam im yong ka jylla, deiwa ong wa lada jia wa uwi yoh u ya ini i kjut daw man ko kawa eh wow kset kamwa da jia cha kiwi ki bynta ka pyrthai.
Da kyntu joor u yaki paidbah wa ym toh u yalehke næ kheiñstiñ ya uni u khñiang kjut, wei waroh toh u toh u em ki i kitkhlieh wow yada ya ka jylla na uni u khñiang uwa da hiar thma yaka pyrthai. Da ong u wa ka Synjuk ki Rangbah Shnong wa toh u chim lang ya ka bynta wa kongsan ha kani ka yaleh nalor ka yakrehlang na ki kynhun Balang, ki seiñ krehmon sñiawbha wa kiwi kiwi.