U President ka Hynniewtrep Youth Council (HYC) uwa man leh uwa yahkhmat ka yakhih Save Hynniewtrep Mission (SHM), u Robertjune Kharjahrin da ong u wa lada ym ye wow pynbait thymme yei bhah thung kreh namo ka Reservation Policy, da bha u phiah noh ya ka jylla.
Da ong u wa kam ka jaitbru Khasi, ki Pnar ym ye de ki wow chah ya ini, neibhah ka Reservation Policy hapoh ka jylla da noh chiliang chwa ko, wei i tam wa i boon paaid yong ki Khasi ya ki Garo da jan man mar chiteiñ, kamtæ da ong u wa kammon uwa em 16 lak ngut wa uwa em 8 lak ngut u yoh ya ka jooh ka bhah.
Da ong chooh chooh u wa katni da i wan ka Roster System ha man ki kaam wa lait da yoh tam chwa ya kiwi neidaw wym ye u pyndap nadooh 50 snem nachwa.
Ki dkhot seiñbhalang hapoh ka Save Hynniewtrep Mission da yachem ki ya u Symbood Montri Rangbah ka jylla, u Prestone Tynsong wow dawa na ka sorkar wow pynbait thymme yei bhah thung kreh, kawa man kawi na ki phang hapoh ka SHM wa da booh.
U Robert da khana u wa neiliang u Symbood Montri Rangbah da ong wa ya ini i kaam wa yatoh waka Reservation Policy, ka sorkar daw pyrkhat ko neibhah wa ya ini i kaam daw hap wow leh deiwa biang bha dei wym ktah wei pynmong ya kiwi.
Uwa yahkhmat ka Save Hynniewtrep Mission da ong u wa du neidaw wa chah ktah chah pynmong ym ye de u pynkylla, itæ ym em yumut de wei bha u pynkhlaad noh da jar jiar ka jylla, neibhah ym ye wow man bait kamni nadooh u snem 1972 katwa ki khynroo Khasi, Pnar won hap ki wow paitke hi-eh.
