Ka seiñ Khooid Ya Ka Wah Myntdu hadien i lai luti yong ka wow dawa yei hok ka wah Myntdu kamjooh yei chngaaiñ kiwa im talawiar yong ka, ha kini ki sngi da sdang ko u yooh kjat ha man ki dong ki chnong ha Jowai hei dur ka pynsñiawthooh paidbah (Awareness Programme) wa ong ‘Save River Myntdu’.
I thmu wa hakhmat yong kani ka pynsñiawthooh toh wow khut kyrsu kyntu ya ki paidbah wa chong chnong wow man kiwa sñiawkhia yei chah ktah ka wah Myntdu ha kini ki sngi neidaw i chna yow sarok wa lai lyngba na Khliehtyrchi hadooh wa poi ha Treiongriang.
Ynnin ka 1 tarik, ka seiñ da yoh ko u pynman ya ka Awareness Programme ha dong Loomkyrwiang heiwa u General Secretary ka Loomkyrwiang chwa wow sdang da e u ki kyntien pdiang burom.
U Khroo Lamsalanki Pariat, President KYWM kam u chongknor da e u ki kyntien yahkhmat deiwa khana pynsñiaw hapyrdi kiwa wan ya chimbynta chaphang i lai luti ka seiñ Khooid Ya Ka Wah Myntdu.
Chooh chooh ong u leh i daw wa pynman ya ka seiñ wow lai yoohkjat ha man ki dong ki chnong ka Jowai kamni toh wow paan ki yei ya krehlang yong ki paidbah kiwa im talawiar ka Myntdu neibhah du kat hei bor wa khian yong ki kam ki dkhot ka seiñ, yoo chem ki wot hapyrdi i em ki aiñ sorkar wa khoom wa kdooh yei man laitlan ki bru, ki bor sorkar wa toh u pait u yoo ym chimkhia ki wow leh yeiwa emkaam næ u ap u sñiaw yei ood i naam yong ki kaam ki dkhot ka seiñ.
U Ruhipaia Lamar, kam uwi na ki dkhot ka seiñ da chim u ka bynta wa kyrpang wow e i klam i kappæ chaphang ka wah Myntdu kawa man ka wah wa da wan da ka hukum Blai wow kær talawiar yei chnong Jowai.
Deiwa kynmoo ya ki kyntien u Soso Tham, da ong u leh wa katni ka chnong Jowai kamjooh ka ri, ka jaitbru em ko hei maa wa khroo kat chawa pait wa kyruiñ wei i daw tre yong ini waroh toh wa kam ki pateiñ wa im ha kani ka juk wa che wa stat da mylliñ lyndet i yei stat næ i sikai u warim.
Chooh chooh ong u leh im i ha kani ka juk kawa da boon kiwa pyrkhat sa du yow biang u toh u tne i doh samen, khapnap won i sñiaw i wow pyrkhat yei miat i bha yonglang.
U Daioolang Pakma, Symbood Waheh Chnong ka Loomkyrwiang, da ong u wa kam kiwa chong chnong ha kini ki sngi man sakhiat i tynjooh wa khroo ya ki manyung ka chnong ka thaw wow yoh tikna ya ka umbaam umdih wa biang wa khooid wa saam lyngba ka PHE, ha kiwa biang wa dap wa yoh u thied umbaam umdih umsait umkhlæiñ da hoi, katwa ha ki manyung won wa ban i duk i chah, i tymbuiñ i duna man i pap i tim, ileh man kamni? U dak kylli waheh bha, kam kiwa chong chnong wa chkeh umbaam umdih umsait umkhlæiñ, um rep um riang na ka wah Myntdu.
Kamtæ da khut kyrpaad u ya ki khon ka dorbar chnong wa i por ymtoh de u chong klikti næ u khñium pohyung pohdoh ya ini waroh i tynjooh wa em hakhmat, chim i kitkhlieh mih chakhmat wow dawa yei hok kam ki bru wa im talawiar ka Myntdu deiwa yakrehlang wa ka seiñ Khooid Ya Ka Wah Myntdu khnang yow yoh bor yoh mynsien ki dkhot ka seiñ u ood u naam hakhmat ka sorkar wei wow kreh neibynta i miat i bha ka wah Myntdu kawa ka chnong ka thaw da pynkyntang pynkyrpang ko kam ka Blai ka Syiem.
Khaddooh da pynkut ya kani ka Awareness Programme deiwa yoh ki kyntien khublei na u Daohi Manner uwi na ki khon khynroo ka chnong Jowai uwa da em i thmu wow pynmih ya ka kot chaphang ka wah Myntdu ka wow yoh ki khynnah u puræ ha ki skur.
Discussion about this post