Shillong: Ka Dorbar mang poisa yong ka jylla kawa da sdang ynne ka sngi heiwa da yoh leh yei klam maitphang na u Lat ka jylla, u Ganga Prasad wei man ko ka sien kawa nyngkong heiwa ha ka yung dorbar chna aiñ ha ka jylla wa u Lat da klam u dei ktien Hindi.
Hadien ini neiliang u MLA ka Mawlai, u Process T Sawkmie da pynbaad u wa u Lat kam u khlieh ka jylla ym em de burom u ya ka yung dorbar neibhah wa da klam u da i ktien wa ki dkhot ym sñiawthooh ki.
Hadien wa pteiñ biang ya ka dorbar u Sawkmie da ong u wa kani man ko sien wa nyngkong ha ka Meghalaya wa u Lat da klam u dei ktien Hindi ka ktien ka wym sñiawthooh ki dkhot, ini i leh u Lat toh lakam wow pynskem yei ktien wa ong wow pynman ya ka ri India kawi ka ri, kawi ka dustur wei kawi ka ktien.
U Sawkmie kylli u leh na u Lamphang wa lada iwa klam u lat man i i jooh kamwa da chon hei ktien pharæng wa da saam cha ki dkhot yeiwa da pynrap leh da u Martin Dango wei neiliang u Lamphang da jubab u deiwa ong wa man ko ka jooh hi.
Heiyatoh wa ini i klam u Lat, neiliang u Dr. Mukul Sangma da ong u wa ym em wa khang wow klam da i Hindi tangwa kani ka yung dorbar ka Meghalaya da sakhi wa heini emkaam wow klam da i ktien wa sñiawthooh lang da waroh.
Da pynrap u deiwa ong wa hapoh kani ka jylla emkaam hi wow klam dei pharæng neibhah wa ki Garo ym sñiawthooh ki yei ktien Khasi katwa ki Khasi nawon ym sñawthooh ki yei ktien Garo.
Katwa u Lamphang ka yung dorbar u Dr. Donkupar Roy da pynsñiaw u wa ym em wa khang wow klam dei Hindi tangwa emkaam wow pynkylla yei jooh cha i ktien wa sñiawthooh lang waroh kiwa mihkhmat wei da dep leh wow pynkylla cha i ktien pharæng.
Kamjooh u Montri Rangbah ka jylla u Conrad K. Sangma da ong u wa ym ye u khang wow klam tangwa emkaam toh wow pynkylla yeijooh cha i ktien wa sñiawthooh waroh ki dkhot.
Ha iwi won i liang u MLA ka KHNAM da ong u wa ini i leh yong u Lat da wailad u wow klam da i ktien Khasi ha ka dorbar wow yaklam wow yania ya kawon kawon ka phang.
Discussion about this post