Jowai: Ka All Jaiñtia Muster Roll Workers & Labour Union (CEC) ha i yahkhmat u K.L. Pariat, President ka seiñ, chirup wa ki wakreh Muster Roll, MDM Cooks na Mihmyntdu deilang wa i ya krehlang wa ka Dorbar Chnong Mihmyntdu hapoh i yahkhmat u waheh M.C. Ryngkhlem, Chairman Chnong wa heijooh i por u waheh dong ka Lumpyrtuh Mihmyntdu, u waheh K. Shylla General Secretary ka dorbar chnong, da pynman ki ynne ka 29 tarik ya ka pynkhooid wei u kær kpær thymme ya i dieñ kiwa da dep thung nadooh ka 29-06-2019 ha ka thaw pyndep niam thang kynriñ ka Seiñ Raij Mihmyntdu, ya kani da leh kamwa pteiñ ya ka “One Muster Roll Worker, One MDM Cook One Tree Mission” yong ka seiñ.
Hadien wa da dep u kær ya ki thaw thung dieñ da em ka yalang kawa khian kawa da pyllai da u waheh C. Ryngkhlem u Chairman chnong ha kawa da pynsñiaw u ya i sñiawngooh ya ka seiñ kawa da pynkynmoo biang ko ya i waroh wa ymtoh dep tang u thung ya ki deiñ tæ ieh wot, tangwa toh u sumaar u pynkhooid biang yow yoh won kitu ki dieñ u heh u kmai ki hadien ha bood.
Heijooh i por da kyrpaad u ya waroh kiwa chong chnong yow yaleh ki u sumaar ya ka Beirymaw, ya ki dieñ ki siej ha chnong ha thaw neibynta u yoh ya ka lær kawa khooid u riñ mynsien, khamtam da kyrpaad u ya ka seiñ wa u yakrehlang wa ka chnong heiyatoh wa kani ka phang thung dieñ thung soh ha u snem uwa daw wan.
Da yoh ya ki kyntien sñiawngooh na u K. L Pariat uwa da e khublei ya ka Dorbar Chnong Mihmyntdu nadooh u Waheh Chnong hadooh kiwa krehkam chnong kiwa da e laad ya ka seiñ u pynkhooid u pynbha biang ya ki dieñ kiwa da dep thung ko, iwa yeini da dep sdang nadooh na ka 21-12-19 ha kawa ka seiñ da pynkhooid da kær ko ya ki dieñ kiwa da thung ha ka 15-06-19 na wah Ianghung, Syntu Ksiar hadooh Pohkhyllem luti Chyrmang. Heijooh i por da kyntu u ya ki sahep khloo wa ya u DC ka WJH wa u sñiawbha ki u e hukum næ u pynkrehkaam ki da ki aiñ kiwa eh yow lait u chah thang sympoor næ u chah thang ki khloo heini i por tlang wa rang ka bneiñ wa raw ki phlang ki rnem, khnang wa yow yoh ki dieñ u heh u san katkam i mon i khæ i yong ki hi. Natloor itæ da kyrpaad ya kiwa chong chnong ka ri-loom Jaiñtia wa u sñiawbha u ya krehlang wa u pynneh pynheh ya ki dieñ ki siej, khamtam ya kiwa daw lai bamdoh leh sñiawbha nadooh na Syntu Ksiar hadooh ha Pohkhyllem sarok Chyrmang wa u yaleh chitom ki u pyllait im ya kitu ki dieñ kiwa da thung tymbood sarok ter ter.
Kamjooh da khana wa kam chibynta ka “One Muster Roll Worker, One MDM Cook One Tree Mission”, neiliang ka seiñ daw pynjoor chooh chooh ko u thung da ki soh ki pæ ha uni u snem uwa daw wan lyngba ki chnat krehkaam ki yong ka kiwa em ha ki C&RD Block ha kiwa boon ki thaw ha ri-loom Jaiñtia.
Ya ki kyntien e khublei heiyatoh wa kani ka kaam da e da u waheh K. Shylla General Secretary ka dorbar chnong Mihmyntdu. Ha kani ka ya krehkaam da ya emlang ka D. Ïakai, Vice President ka seiñbei, ka H. Dkhar, General Secretary ka seiñ chnat Jowai wa ka N. Toi, General Secretary ka seiñ MDM Cooks cum Helper.
Discussion about this post