Ka Khun Hynniewtrep National Awakening Movement (KHNAM) da dawa ko wow booh bhah 80% i kreh ya ki jaitbru ka jylla Meghalaya ha ki thaw kreh ki bru samen wei kamjooh ha ki karkhana.
Ka KHNAM ynne da e dorkhat ko cha u Chief Secretary ka Meghalaya, u DP Wahlang najrong ki dawa heiyatoh wa ki kyndon pynkylla ya ka State Reservation Policy.
Neiliang u President ka KHNAM da ong u wa da yoo katni kat chawa pait yei wym yoh kreh hapoh ka jylla wei da sñiawthooh leh wa ka sorkar ym ye ko wow e kreh ya waroh, kamtæ ki thaw kreh ki bru samen leh toh u thap ki hapoh ka Reservation Policy iwa daw yarap yei dooh kreh ki khynroo khyllood ka jylla.
Da kdaw u leh yaka Office Memorandum (OM), kawa da pynmih haka 18-06-73 hapoh ka Para 7.2 kawa da kynthup lang ya ki karkhana sorkar, ki thaw puræ wa yoh yarap naka sorkar wa ki Contractor wow em ki hapoh ka State Reservation Policy, kamtæ da ong u wa ym yoo iyi iyi i eh wow kynthup leh ya ki thaw kreh wa ki karkhana ki bru samen.
Neiliang ka KHNAM haka 31-05-23 da dep ko wow e yeiwa da tyrwa yong ka heiyatoh iwa emekaam wow pynkylla hapoh ka Reservation Policy kamjooh ki Office Memorandum kiwa da pynmih neipor cheipor da ka sorkar.
Da pynsñiaw u leh yei sñiawkhia yei pynslem wow rai khaddooh yow pynbait ya ka Policy wei da kyntu u ya ka sorkar wow pynsmat yeini i kaam.
Discussion about this post