Shillong: Ka Khasi Student Union (KSU) da booh ko 17 tylli ki phang hakhmat u montri ka tnat puræ puthi ka jylla, u Lahkmen Rymbui wa ka sorkar u pynkrehkaam noh ko neibynta wow pynmiat pynbha ya i puræ puthi hapoh ka jylla.
Ki phang wa ka KSU da booh ko hakmhat u montri toh wa ka sorkar u pait ko ya i pynku khlem yurim ki skur samen ya ka bai skur, kawa da wanrah yei eh i khoo ya ki bei ki pa ki khynnah wow pynpyrkhat bakla yei mih ki skur samen. Ki phang wa ka seiñ dawa ko na ka sorkar kynthup ki leh wa ka sorkar u pait ko ya i pynkylla ya ki syllabus ha ki skur nadooh class I hadooh class VI, i dai wa i booh dor ki skur samen ya ki sula skur (uniform), ki kot wa kiwi kiwa emkaam ha skur, i booh dor wa heh khlem yurim wot ya ki admission form kawa da ktah ya ki manyung wa duna i yoh, i pynmih biang por ya ki result ki khynnah wa toh u puræ ha ki skur waphær waphær.
Hajrong kini, ka seiñ da dawa ko na ka sorkar wow thung noh ya ka Regulatory Body kawa sariem ya ka Meghalaya Private Universities Regulatory Board (MPURB), kawa ye u pait ya i rukom krehkaam ki skur kiwa em ha ka jylla. Chooh chooh wow wanrah ya ka aiñ kamwa leh ka Tamil Nadu, Maharashtra wa Delhi khnang wow pynkhor wei wow bichaar yei rukom khrong bai skur.
Ka seiñ da pynsñiaw ko leh ha u montri wow esikai ya ki khynnah mynkna khlem su kawon kawon ka bai skur katkam ka Article 45 ka riti synchaar ka ri India, khnang wow pynduna ya i pep skur chiteiñ por wei wow yarap ya ki khynnah na ki manyung wa dooh. Heijooh i por da ong ko leh wa emkaam wow pait ko yei pynmih kot khalær ka MBOSE.
Ki dkhot ka KSU hapoh i yahkhmat u General Secretary, u Donalad Thabah wa u Chairman ka Education Cell, u Readyon Stone Nongrum kiwa da pynsñiaw leh ha u montri wa i hiar i puræ puthi hapoh ka jylla toh neidaw wa duna ware ki College sorkar, heiwa da kyntu wow booh ya ka sorkar wow booh ya ka Govt. College ha waroh ki district khnang wow yarap ya ki khynroo kiwa em ha ki thaiñ nongkyndong kiwa duna i yoh.
Hawa yaklam wa kiwa pathai khubor u Readyson da ong u wa ka seiñ da kyntu ko leh ya ka sorkar wow pynsmat wow chna noh ya ka Engineering College wa da booh ya u mooyurim ha uni u snem wa dadep ha Shillong Polytechnic kawa em ha Mawlai, wow wai ya ki Coaching Centre, wow pynneh ya ka subject Khasi (MIL) kam ka subject wa kongsan ha ka MBOSE.
U Nongrum da ong u heiyatoh wa ki bru kiwa em i duna ha i doh i pran kiwa man kyrpang, ka seiñ da e yumut ko wa ka sorkar toh u pynbiang ya ki tiar wa emkaam ki ha skur khnang wow ye ki u ryngkat wa kiwi tawon ki khynnah puræ.
Da ong u wa ha ki skur LP yong ka sorkar, boonsien da thung ya kiwa sikai da ka School Managing Committee, kamtæ da kyntu ya ka sorkar wow thung ya kiwa sikai katkam wa thung ya kiwi tawon ki kyrdan kreh deiwa pynman exam wa ki interview.
Da ong u leh wa ki skur adhoc ha ka jylla lai-lait ki ya ka rukom thung kreh hapoh ki skur katkam ki kyndon wa da booh da ka sorkar, wei wow thung krehkatkam ki kyndon sorkar wei wow bhah kaam ya ki katkam ki kyndon sorkar wei wow pynchitom ya ki skur kiwa leh pyrchah yeini.
U Nongrum da pyntip u wa neiliang u Lahkmen da kular u wow chimkhia yeini wa dawa ka seiñ wei wow thung kreh ha ki kaam sikai da kiwa yoh 45% wei wow pynman leh ya ka eligibility test.
Discussion about this post