theme-sticky-logo-alt
theme-logo-alt
Advertisement ad1

Booh ka MPSC da iwa phær i Cut Off Marks neibynta ki Garo waki Khasi-Jaiñtia: Shangpliang

Advertisement ad1

U MLA ka liang pyrchah, u HM Shangpliang ynne ka sngi hapoh ka yung dorbar da kdar u yei rukom krehkaam ka MPSC kawa da pyndooh mynsien ya ki khynroo ki khyllood wa yaleh kreh hapoh ka jylla.

Da khana u yeiwa jia ya kiwa yaleh Exam MCS kawa da pynbna paidbah ha u 2017 heiwa da pynman ya ka Preliminary Exam ha ka 04-08-18 heiwa ya ka Result da pynbna ha ka 05-10-18 tangwa ka MPSC khlem da pyntip cha kiwa yaleh Exam da rai ko wa ka Paper I waka Paper II u man ki kam ki Compulsory Subject wei emkaam 35% kam ka Qualifying Marks ha ka Paper II iwa da man kamwa murieh yeini na kiwa yaleh Exam.

Chooh chooh ya ka Cut Off Marks neibynta ki Khasi wa Jaiñtia da booh 208 Marks katwa ya ki Garo 188 Marks manda kheiñlang yaka Paper I wa Paper II, kamtæ u Shangpliang da ong u wa neiwon yoh bor ka MPSC wow leh kamni wow pynyaphær hapyrdi ki jaitbru ri-loom ka jylla.

Da kdaw u leh yei wym jooh khana, yei wym jooh pynyoo ka MPSC katwon yoh Marks kiwa yaleh Exam iwa da wanrah yei suba sih na kiwa boon kiwa da hap wow yaleh da ka RTI. Kamtæ yow lait na ini wei yow man leh ka rukom pynman Exam kawa khooid toh u pynyoo paidbah katwon yoh Marks kamwa da leh ha kiwi ki jylla nadooh ka Tripura, Manipur wa Sikkim.

Da ong u leh wa ka MPSC toh kawa suki bha wow krehkaam heiwa da em ki kreh kam ya ki Typist kiwa da pynbna nadooh u snem 2016 tangwa dang ha uni u snem da sdang wow leh ya ka Screening iwa da chimpor hadooh 6 snem wei ini da pynman ko leh ya kiwa boon wow man ki kiwa da heh rta. Da kdaw u leh yei yaleh kreh Inspector of Taxes kawa da pynman ha u 2017 katwa ya ka Result da pynbna ha ka 22-12-21.

Da pynsñiaw u leh yei phylla wa ka MPSC lyngba ka Officer Order da ong ko hawa jied bru wa yaleh kreh toh u pynman lyngba ka Written Exam tangwa da ka Personal Interview lada toh kiwa khian kyrdan namo ki Entry Level.

Heiwa ka MPSC da tyngkheiñ ko pyn ya ka hukum yong ka hi deiwa lyngba ka Personal Interview da jied ya 28 ngut ki Lecturer ha ki College sorkar, 40 ngut ki Assistant Lecturer ha ki Higher Secondary School ka sorkar wa 60 ngut ki Doctor kiwa waroh da yoh kreh khlem da yaleh ya ka Written Exam.

U Shangpliang da khana u leh wa hapoh ka MPSC ym em ko ya ka Service Rule heiwa hadooh da u Typist da yoh u wow ku kyrdan Controller of Exam, u Peon da yoh u wow man kam u Superintendent wa sa uwi u Typist da yoh u wow man kam u Deputy Secretary uwa pyndep du ya ka Class-XII ka puræ puthi.

Heiyatoh waka DSC, u Shangpliang da ong u wa kani leh toh ka jooh kawa boon i leh chiliang deiwa thung kreh para wa ya tipmit wei manda yaleh RTI ki bru leh da kyntait wow pdiang ya ka. Wei boon kiwa bood kot tooh, kiwa leh thok hawa yaleh Exam.

Hawa e yei jubab hajrong kini kiwa boon wa da pynbaad u Shangpliang, neiliang u Montri Rangbah ka jylla, u Conrad Sangma da ong u wa ka MPSC toh kawa man laitlooid wei ka soskar ym ye ko wow tuklar wei lada tuklar leh daw chah pynbaad wa em i leh sop sop.

Tangwa da ong u wa ka MPSC da chem chitom ko wow yoh thaw u pyman Exam neibhah ka Hall wa em ha ka chniam du 450 ngut ki bru, wei da sdang wow pynemkaam da ki OMR Sheet hawa pynman Exam yow pynduna yei em i bakla.

Da pyrchang leh wow pynboon ya ki thaw yaleh Exam najrong kawa em ha Shillong wa Tura wei wow pynman leh da ka Common Exam neibynta ki kreh wa emkaam ya ki jooh ki kyrdan puræ puthi wa ka jooh ka rukom su.

Heiyatoh waka DSC, u Conrad da ong u wa da bood ko katkam ki kyndon yow man ka yaleh kreh kawa khooid heiwa ha Baghmara hawa pynman ya ka Personal Interview da riñ dur lang deiwa pynrap u wa biang hi waroh ki buit wa da e u MLA wei ka sorkar leh daw chimkhia ko ya ini.

Advertisement ad1
Share this:
Previous

Le sngi u khang dai kiad ha Elaka Nartiang wa Shangpung

Next

Pdiang ka JHADC ya ka Mang Tangka yong u snem 2022-23