Jowai: Kam chibynta wow pynneh pynsah ya ki dakha wa doh-um ha waroh chi lynter ka wah Lakroh wa kamjooh ha ki chnat ka wah, da wan booh ya u Moo-yurim yong ka seiñ War East Elaka Satpator Fishing & Environmental Protection Association (WEESFEPA) haka 9 tarik uni u bnai ha chnong Lakroh, da ki dkhot ka seiñ hi kam wow sah kynmoo ya i thmu wa bha yong ka seiñ.
Ym du katni ka seiñ leh da ong ko wa leh wa i thmu hi toh wow pynneh pynsah yei man tre wei wow pynmiat pynbha ya ka rymaw waroh chilynter ka wah khamtam ka kchaaid Pachum yong ka wah, deiwa maham ya ki bru wa chim kabu kiwa em i thmu wow tynyap khiar ya ki dakha doh-um ha kani ka wah wa ki wah khian wa tooid cha ka.
Ha katai ka sngi da pynlait symbe dakha leh kamwa 2 kilo kawa man kam ka sakhi ya i thmu wa bha yong ka seiñ wow chimkti ko ya ka wah neibynta i bha i miat lang waroh.
Hadien wa dep booh moo-yurim da pynman ya ka yalang Committee yong ka seiñ. Ha ka Committee da rai lang wow lai kyrpaad paan yarap naka sorkar, District Council, MDC ka thaaiñ, Fishery Department wa Tourism Department wow pynmiat chooh chooh ya ka wah yow pynnneh dakha waroh chi snem lynter ha kani ka wah wei leh u pynman ya ka kchaaid Pachum kam ka thaw lai uiñke suwari.
Discussion about this post