Ampati: U Montri Rangbah ka jylla u Dr. Mukul Sangma hei emlang ka montri ka tnat puræ puthi ka Deborah C Marak ynnin ka 24 tarik da booh moo-yurim ki ya ka Engineering College wa nyngkong ha ri-loom Garo ha Ampati, South West Garo Hills.
Kani ka Engineering College kawa man kawa ar hapoh ka jylla daw chna ya ka ha Kebolpara iwa jangai kamwa 4 Km na Ampati.
U Montri Rangbah hei klam yong oo da ong u wa da mang poisa T. 41 Klur wow chna ya kani ka College wei deiwa em ko daw yarap ko ya kiwa boon wa kwah u lai puræ iwa daw pynku ya ka chnong ka thaw.
Da jubab u ya kiwa kylli neiyi i daw emkaam artylli ki College hapoh ka jylla deiwa ong wa ka jylla hi toh kawa dang em hapyrdi i ku waroh i liang kamtæ haap pyndep ya waroh kiwa da kular wei dang em ki thaw ympu biang sarok wa kiwi wa emkaam man ka sngi.
Chooh chooh da ong u wa da dap ka jylla katni 45 snem wei ha ki 5 snem chwa wow dap 50 snem dang biang i por wow pynpoi kyrdan wa kiwi ki jylla hapoh ka ri.
Hei yatoh wa ki thaw puræ da ong wa man ki wow yarap ya ka sorkar wow chem laad ya kiwa boon ki chitom ka sorkar chem ko wa ya ka ri hi waroh kawi u ku ko, wei manda em ki bru wa stat yarap ki ya ka imlang sahlang.
Da pynbna u leh wa daw booh moo-yurim ya ka Captain Williamson Technical University ha Tura waka College of Science and Commerce ha Mahendraganj ha kini ki sngi wow wan.
Ka Deborah C Marak won hei klam yong ka da ong ko wa ka sorkar kreh ko wow pynjanai ya ka tnat puræ puthi hapoh ka jylla wei i chna ko ya ki thaw puræ pynbniah kiwa em cha jan ki chnong ki thaw wa sah ki bru ym du cha sor daw yarap ko ya kiwa boon kiwa wan na ki yung wa dooh wa duk.
Da ong ko leh wa emkaam u chimkhia ya ka puræ puthi hapoh ka jylla wei emkaam u pynwiar noh ya i myllien wow phah da kiwi wow sikai hei thaw kiwa da dep thung kreh.
Discussion about this post