U montri rangbah ka jylla, u Conrad K. Sangma ynne da booh mooyurim u wow chna ya ka Indoor Stadium ha Jongksha, East Khasi Hills hei emlang u montri ka chnat Sports, u Banteidor Lyngdoh.
Ya kani ka Stadium daw chna hei lut iwa T. 22 klur wei da antaad wow pyndep u chna hapoh u Kmaichonglad (December) 2022.
U Conrad K. Sangma hawa e i klam da yaroh u ya u montri ka chnat Sports uwa da kreh chitom wow pynku ya ki kaam yalehke Sports deiwa pynrap wa ka sorkar yaleh ko u pynku ya ki kaam yalehke Sports hapoh ka jylla.
Heiyatoh wa i duna ki thaw yalehke Sports, neiliang u Conrad da ong u wa hapoh ka jylla boon bha kiwa em sap tangwa neidaw wa duna kiwa esikai wei kiwa yah luti ya ki, ki khynroo khyllood ymye ware ki u poi ha ka thong yong ki wei kani ka sorkar u yaleh ko u yarap wow pynjanai yeitæ i sap wa em ki.
Da pyntip u leh wa hapoh chi bnai daw pyndep noh ya ka Meghalaya Youth Policy heiwa daw kynthup ya ki kaam wa boonjait. Da kular u leh ya ki khynroo khyllood wa kam ka sorkar daw yahluti ko ya ki.
Ha kani ka sngi da pynkup burom leh ya ki khynroo kiwa da wanrah naam ha ki lympung yalehke waphær waphær ha ka jylla, ka thaaiñ wa ka ri hi waroh kawi ha ki snem wa dadep.
Ki paidbah ka thaaiñ da ekti ki leh ya ka dorkhat ha u Conrad heiyatoh wa ki kaam pynroi nadooh ki sarok, ki luti syngkieñ, wow pynku kyrdan ya ka PHC wa kiwi kiwi.
