U Montri Rangbah ka jylla, u Conrad K Sangma, ynne da booh mooyurim u ya ka yung krehkaam ka Rerapara C&RD Block ha South West Garo Hills kamjooh leh da wai u ya ka SHG Mela hei emlang u MLA ka North Tura, u Thomas A Sangma, u MDC ka Boldamgre, u Stevie Marak wa kiwi kiwi.
U Conrad K Sangma da ong u wa ka sorkar jylla da kreh ko neibynta wow yoh kreh ki kynthai, ki warep wa kamjooh ki khynroo deiwa sdang ya ki kreh waki Scheme wei kawi na kini toh wow yarap ya ki Self Help Groups (SHGs) lyngba ka National Rural Livelihood Mission (NRLM).
Da ong u wa da sdang ya kiwa boon ki SHG ha ka jylla wei da ye wow e yarap ya ki kam da ka Start Up Funds, Revolving Fund, Community Management Fund wa ki ram na ki Bank.
Da ong u wa ki 40,000 tylli ki SHG kiwa em dkhot kamwa 4 lak ngut da yoh yarap ki hadooh T. 220 klur na ka jylla.
Ha kani ka sngi kamwa 12 tylli ki Village Organisation hapoh ka Rerapara C&RD Block da yoh yarap ki T. 1.30 klur wei T. 50 lak ka ram na ka Meghalaya Rural kawa khlem sut.
U Conrad da pyntip u wa T. 2.25 klur da e wow chna ya ka yung thymme kani ka Block heiwa da kyntu u ya u BDO wa u Contractor wow pyndep smat ya kani ka yung.
Da pyntip u wa ki Block ha ka jylla boon toh kiwa khlem yung krehkaam kamtæ ka sorkar da booh ko T. 120 klur neibynta ki yung krehkaam ha ki 46 tylli ki Block ha ka jylla wei ya ka Tender daw khut ha u Wisu (Mar) wa u Naitung (Apr) uni u snem.
