U montri rangbah ka jylla u Conrad Sangma ynne ka sngi da booh u ya u mooyurim yaka yung thymme ka Capt. Williamson A Sangma Memorial College hei emlang u montri ka chnat puræ puthi u Lahkmen Rymbui, u MLA ka Baghmara u Samuel Sangma, u MLA ka Siju Rongara u Rakkam A Sangma wa kiwi kiwi.
U Conrad da ong u wa toh i thmu yong ka sorkar wow pynbha pynmiat yaka puræ puthi hapoh ka jylla wei kani ka yung College wa thymme daw yarap ko wow pyndap yeiwa emkaam ka Baghmara khamtam kiwa lai puræ ka South Garo Hills.
Chooh chooh da ong u wa i thong yong ka sorkar MDA toh yow wanrah ya i roi i paar cha ki thaaiñ wa em cha kdong cha chmiang ka jylla wei ka South Garo Hills toh kawa da chah ieh mylliñ da boon snem wei da booh hakhmat wow wanrah ya i roi i paar ha kani ka thaaiñ.
Da booh yaka mang poisa wa T. 12 klur neibynta kani ka yung College wa thymme.
Ha chwa ini da lai booh syntu u Conrad ha u mot sah kynmoo kawa man leh ynne ka sngi ka lyngkhooh dap 30 snem i khlaad u Capt. Williamson A. Sangma uwa man leh kam u montri rangbah wa nyngkong dooh ka Meghalaya uwa man leh uwa nyngkong dooh u jaitbru Garo wow yoh u man kam u Lat heiwa da man u kam u Lat ka Mizoram ha u snem 1989. Ya u Capt. Williamson da kha ya oo leh ha Baghmara.
Uni u mot sahkynmoo toh uwa da wai paidbah ynne ka sngi da u montri rangbah.
