U Montri Rangbah ka jylla u Conrad K. Sangma ynne ka sngi da booh u ya u mooyurim yow pynku kyrdan ya u sarok Umling-Patharkhmah uwa na Umrit cha Umdu deiwa emlang leh u Symbood Montri Rangbah u Prestone Tynsong wa u MLA ka Jirang Constituency u S. Sohtun.
Uni u sarok wa jrong 31.091 Km na Umrit cha Umdu toh uwa da yarap poisa da ka World Bank T. 58 klur wow chna hapoh ka Meghalaya Integrated Transport Project (MITP).
U Conrad da ong u wa ini i booh mooyurim toh ka sngi wow sahkynmoo iwa daw pynku yei khayi pateiñ, i yoh i kot ki bru heiwa uni u sarok toh uwa da chah ieh mylliñ la 40 snem. Deiwa kdaw leh wa ha kini ki 2 snem chiteiñ ka chnat PWD da pynlait poisa ko T. 5000 klur hapoh ka PMGSY, National Highways, World Bank Projects wa kiwi de ki kaam wei da leh ya ini neidaw wa sñiawthooh wa emkaam ki sarok wa biang yow pynku yei yoh i kot.
Da ong u leh wa u sarok warim dooh ha ri-loom Garo u Rongram-Dadenggre-Phulbari ym jooh em i pynchna i pynku kyrdan ya oo, wei ha i sien wa nyngkong ka chnat PWD daw chna ko ya u sarok deiwa thymme uwa da chong dor kamwa T. 145 klur.
