U Montri ka chnat Soil & Water Conservation Minister uwa man leh kam u MLA ka thaaiñ, u Hamletson Dohling ynne da booh u ya u mooyurim yow chna ya ka Lummawbah Government Lower Primary School wei da wai u leh ya kiwa boon ki kreh hapoh ka Soil & Water Conservation hapoh Lummawbah, Upper Shillong ha ka yalang wa da pynman da ka chnong Lummawbah ha Lummawbah Lad Mawbynna.
Hawa e yei klam, u Hamlet da ong u wa kam uwa chong chnong kani ka chnong toh i kaamram yong oo wow e iwa bha tam yow pynku ya ka chnong waroh kawi. Da yaroh u leh ya ka Executive Committee ka chnong yei krehchitom ki wow booddien ya kiwa boon ki Scheme wa em hadooh wa yoh ya kini ki Scheme ha Lummawbah.
Da pynsñiaw u leh yei kmen wa kani ka Government LP School toh kawa nachwa kawa da sih bha khlem chna da boon snem wei da kyrmen u wa deiwa pyndep u chna thymme daw yarap ko wow pyndap pynbiang ya iwa emkaam ha ka puræ puthi ki khynnah ka chnong kamjooh ki chnong wa em cha jan.
Da khana u leh wa i chna toh la kamwa 75% iwa da dep wei ha u snem wow wan da ye wow pynemkaam noh.
Da ong u leh wa kmen u wow yoh u wai ya kiwa boon ki kreh lyngba ka chnat Soil & Water Conservation kiwa yatoh wa ki tyllong um ka chnong. Deiwa pyntip wa palat 500 tylli ki thlu yung daw myntoi ki na ka Jal Jeevan Mission wow yoh umkor ha yung. Kamtæ da khut u ya waroh ki paidbah wow ya krehlang waka sorkar yow yoh myntoi lang waroh.
Ki kreh kiwa da wai hapoh ka Soil & Water Conservation kynthup ki yow chna ya ka RCC Dam Cum Water Distribution Chamber ha Sangmein, ka yingkieñ kjat ha Dongsohra, Lummawbah waka RCC Dam Cum Water Conservation Structure ha Lummawbah.
U Montri ha kani ka yalang da saam u leh ya ki Computer cha ka Lummawbah Government Lower Primary School.
