Ynne ka sngi da man ko kawa sahkynmoo ya ka thaaiñ Shangpung heiwa u montri ka chnat i chait i khiah, u James Sangma da wan booh u ya u mooyurim wow pynku kyrdan ya ka Shangpung PHC cha ka CHC hei emlang u MLA ka thaaiñ, u Comingone Ymbon.
Ya ka yalang wow booh mooyurim da pynman ha Community Hall ka Shangpung heiwa da pynlai ya ka yalang da u DM&HO, u Dr. A. Ajhar wa ki kyntien pdiang burom na ka Addl. DM&HO ka West Jaiñtia Hills ka Dr. B Challam.
Ya kani ka thaw sumaar wa thymme daw chna ha Pohlyngdoh, Shangpung Pohchnong heiwa na ki 10 pyllong ha ka PHC daw pynboon cha ki 30 pyllong ha ka CHC heiwa daw em leh ki Specialist wa kiwi kiwi.
Neiliang u Comingone Ymbon hawa e yei klam da ong u wa ynne ka sngi da man ko ka sngi wow sahkynmoo heiwa da ekhublei u ya u Montri Rangbah wow ban hajrong wow pynku kyrdan noh ya ka PHC cha ka CHC.
Da yaroh u leh ya kiwa kreh ka chnat i chait i khiah wa kamjooh leh ya ka synjuk ki waheh chnong wa da kreh ki khlem chongngiah.
Chooh chooh da ong u wa ka chnong wa ki talawiar yong ka daw yoh myntoi bha ki na kani ka thaw sumaar khamtam ha i chait i khiah.
U James Sangma kam u kongsan ha kani ka sngi da ong u wa nadooh wa chimkti u ya ka chnat kam u Montri, neiliang u MLA ka thaaiñ da booddien bha u ya ini i kaam wei yeini ymye u len.
Da ong u wa i chait i khiah toh iwa kongsan tam ya ka imlang sahlang wa ha ka sorkar wei emkaam wa ki thaw sumaar u ye ki wow sumaar ya kiwon kiwon ki jait kjut.
Chooh chooh da ong u wa i wan ka khlam COVID-19 da man iwa khroo bha ha ki snem wa dadep wei da pynkhyrngiat ko ya i wow leh yeiwa emkaam wow pynbha ya ki thaw sumaar.
“Ki Doctor yong i wa kiwi kiwa kreh haphrang dooh wow yakhun pyrchah ya ka khlam da kreh ki khlem sangeh pyrchah ya ka khlam,” da ong u Janes deiwa ekhublei kyrpang u ya ki waroh.
Kiwi kiwa da klam ha kani ka sngi toh u Waheh Chnong ka Shangpung Pohchnong, u R. Rabon. Katwa ya ki kyntien khublei da e da ka Medical & Health Officer ka Shangpung PHC, ka Dr. Chyrmang.
