Shillong: U Deputy Chief Minister uwa pait leh yaka PWD (Roads), u Prestone Tynsong, ynne ka sngi da booh u ya u mooyurim yow pynku kyrdan wei wow pynbha pynmiat (Upgradation/Improvement) ya u sarok Shillong-Diengpasoh Road hei emlang u Secretary, PWD, u T G Nengnong, Chief Engineer, NH, u B Marak, Chief Engineer, PWD (Standard), u G K Marak, wa kiwi kiwi de.
Uni u sarok toh uwi na ki 10 tylli ki sarok wa da jied hapoh ka Phase-I yong ka Meghalaya Integrated Transport Project (MITP) kawa da kyrchaan daka World Bank EAP. Ya u sarok uwa katni uwa hoi wow lai du chilliang ki kari, daw pynkylla cha kawa ye ki kari wow lai waroh arliang namo ka 2-Lane uwa jrong waroh 11.769 KM. I kyrchaan ka World Bank toh nadooh wow pynheh ya u sarok, u siang rong wa kiwi kiwi de wei uni u sarok daw pynyabi u yaka Shillong waka New Shillong Township kamjooh waka Shillong Bypass.
Ha ka yalang wa pynman ha madan bol ka Mawdiangdiang, u Tynsong da ong u wa manda pyndep ya uni u sarok, daw man ko chibynta na ki sarok wow pynklla yei yabi ki sarok ha Meghalaya. Deiwa ong leh wa ka Mawdiangdiang wa ki thaw wa em chajan daw em ki hapyrdi heiyatoh wa i synchaar sorkar ha ki snem wow wan wei daw em leh boon ki yung krehkaam ka sorkar kiwa daw chna ha ki snem wow wan ha kani ka thaaiñ. Kamtæ kani ka sarok daw man ko i kyrkhu ya ki paidbah kani ka thaaiñ.
Da ong u leh wa da em boon tylli ki kreh sarok wa da sdang hapoh ka jylla ha kini ki snem wa da dep wei da yooluti u wa ini waroh daw pynsuk ko yaki paidbah kamjooh wow pynduna nei khynnia kari. Kamtæ da kyntu u ya kiwa chong chnong wow ya krehlang wa ki Contractor kamjooh ki sahep sorkar yow lai bait i kaam.
