Jowai : Ka Jaiñtia Students Union sñiawkhia ko wa ki MDC ka JHADC ym em por ki u yaklam yei roi i paar wei neibhah i bha i miat ka jaidbru neibhah boonkaam ki du hei yaknieh chuki donhi.
“Yeini da chem da chynna neipor chei por yei rhah bor ki MDC ka JHADC wei lada kamni man ki MDC yong i yow yathied yadai para ki yow yoh chuki cheiwon u poi ka jaidbru” da ong u ma Rikut Parieñ u President ka JSU.
Ka seiñ da ong ko leh, wa ki MDC ym jooh rap em u yañia ki yei bha i miat ka jaidbru neibhah wa dei langær ka dorbar ymjooh yaklam ko neibynta ka roi ka paar katkam wada bynta ya ki ha ka Sixth Schedule ka Constitution ka ri India.
“Lada ki MDC klam ki neibynta ka jaidbru tæ ileh won kut ka dorbar du hapoh ar minit weiwa iwa slem dooh du chi kynta kattæ leh du chi sngi ar sngi” da pynrap biang u ma Rikut.
Ka seiñ da ong ko leh wa ki MDC da man ki kam kiwa chet kylla ya ki khon ka jaidbru Pnar.
“Neiliang ka seiñ, kwah i yow yoo yei roi i paar wei ym kwah i wow booh ya ka jaidbru haphrang ka chuki” da pynkut u ma Rikut.
Discussion about this post