Boon dooh kiwa thap Vote hapoh ka 1-Nartiang na ki Constituency wa em ha West Jaiñtia Hills

U DC ka West Jaiñtia Hills District, u BS Sohliya uwa man leh kam u District Election Officer ynne da pynlait u yei pyrtuid kiwa thap Vote kiwa man kiwa khaddooh (Final Electoral Roll) chwa wow pynman Election deiwa kheiñ ya ka 01-01-24 kam ka tarik kiwa thap Vote kiwa da dap 18 snem i rta kawa tip leh kam ka Qualifying Date.

Ya kini ki Electoral Roll da saam cha kiwa mihkhmat ki seiñ saiñpyrthai kiwa da wan wow embynta ha ka yalang wa da pynman ha Conference Room u DC ha Jowai ynne i sngi.

Neiliang ka B. Blah, ADC da ong ko wa i thap pyrtuid daw pteiñ i lyngba ka Online wa Offline wei neiliang ka yung krehkaam u District Election Officer leh daw phah ko ya ki kari EVM Demonstration Van cha ki paidbah yow pynyoo kammon wow pynemkaam ya ki kor EVM kamjooh i krehkaam ki kor VVPAT.

Chooh chooh da ong ko wa ki paidbah kiwa kwah u tip kammon wow pynemkaam ya ka kor EVM wei kamjooh leh kammon krehkaam ki kor VVPAT ye ki wow wan cha ka yung krehkaam u DC ha Jowai.

Related posts

Dam noh ka NPP wow kyrchaan ya ka sorkar ka Manipur wa yahkhmat da ka BJP

November 17, 2024

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Neiliang u DC da ong u wa ka West Jaiñtia Hills toh kawa nyngkong dooh ka District wow pyndep ya waroh ki ujor wa da yoh na ki paidbah kamjooh u pynbait ya waroh iwa bakla, u pyndam yei pyrtuid kiwa da kyrriah Constituency, kiwa da khlaad wa kiwi kiwi de.

Ka Electoral Roll wa da pynlait ynne ka sngi toh neibynta ki soo tylli ki Constituency wa em ha West Jaiñtia Hills wa kynthup yaka 1-Nartiang, 2-Jowai, 3- Raliang waka 4-Mowkaiaw katwa yaka 7-Amlarem daw pynbna won da u SDO ka Amlarem Sub-Division.

Ha kini ki 4 tylli ki Constituency da em 230 tylli ki Polling Station kiwa da pynbait khaddooh neibynta ka Election wa daw wan wei na kini ki 4 tylli ki Constituency kiwa boon dooh kiwa thap Vote toh kiwa em ha Nartiang Constituency.

I rukom em kiwa thap Vote ha kini ki soo tylli ki Constituency man i kamni ha wah:

1-Nartiang: Waroh kiwa thap Vote da em ki 45,375 ngut heiwa ki chynrang da em ki 22,328 ngut katwa ki kynthai won 23,047 ngut iwa da ku da 1038 ngut nadooh ka Election MLA 2023.

2-Jowai: Waroh kiwa thap Vote da em ki 41,345 ngut heiwa ki chynrang da em ki 19,464 ngut katwa ki kynthai won 21,881 ngut iwa da ku da 1137 ngut nadooh ka Election MLA 2023.

3- Raliang: Waroh kiwa thap Vote da em ki 40,019 ngut heiwa ki chynrang da em ki 19,001 ngut katwa ki kynthai 21,018 ngut iwa ku da 1215 ngut nadooh ka Election MLA 2023.

4-Mowkaiaw: Waroh kiwa thap Vote da em ki 39,669 ngut heiwa ki chynrang da em ki 19,624 ngut katwa ki kynthai won 20,045 iwa ku da 979 ngut nadooh ka Election MLA 2023.

Ki Polling Station wa boon dooh toh ha Nartiang Constituency kiwa em 63 tylli, neitæ ha Jowai 57 tylli wa mar 55 tylli ha Raliang wa Mowkaiaw.