Jowai: Ynne ka sngi ha ka dorbar l’yur ka JHADC neiliang u Lakhon Biam da kylli u na u EM Incharge ka chnat Civil Works Department, u Phasmon Dkhar heiyatoh wa katwon ka poisa wa da pynemkaam ya ka Council Own Fund (COF) nadooh ka 1 Naiynñiaw 2019 hadooh 30 Naiynru 2020.
Neiliang u Phasmon da jubab u wa hapyrdi kini ki tarik da pynemkaam hadooh T. 2.83 klur.
Hajrong ini i jubab neiliang u Lakhon da kylli u ya ki jait kreh wa da leh lyngba kani ka poisa, yeiwa u Phasmon da jubab u deiwa ong wa ka poisa chong ko hei pynemkaam ki bru wa yoh myntoi na ki dkhot (Member) ka Council.
U Lakhon dei chrai da kylli u yei daw wa da yoh ya kani ka poisa du ki dkhot (Member) ka liang synchaar namo ka Ruling Party wei deiwa sai ya ki kot ki sla wa da yoh u na ka chnat CWD da kylli u leh yei daw wa da thap ya ka poisa cha ki Bank Account yong ki MDC wei na ki Account yong ki won da sai ya kani ka poisa wow e cha kiwa yoh myntoi wei da em ki bru wa da yoh myntoi hadooh T. 50,000 samen.
Chooh chooh u Lakhon da kylli u wa neiyi i daw wa ya ka poisa ym em thap ha ki Account yong kiwa yoh myntoi (Beneficiary) wei hajrong ini neiliang u Phasmon da jubab u deiwa ong wa boon ki bru ym em Bank Account Number ki.
Hajrong ini i jubab u Lakhon dei khmat wa sooh-rkhai da ebuit u ya ki MDC wow kyntu ya ki paidbah wow wai Bank Account ki wei ya kani ka poisa yarap na ka Council toh u phah (Deposit) bait ha ki Account ki paidbah wa yoh myntoi.
