Ynne ka sngi u MDC ka VPP u Andrew Shullai chirup wa ka Youth Wing ka Party da yachem ki ya u DC ka West Jaiñtia Hills uwa man leh u Chairman ka DSC heiyatoh wow pynbha pynmiat yei rukom thung kreh hapoh ka District.
U Andrew hadien i yachem da ong u wa katkam ka hukum toh upyndep yei thung kreh hapoh 6 bnai tangwa ini ym yahaap de i wei kreh ka DSC neibhah da em ki kreh wa pynbna nadooh u 2021 tangwa hadooh katni ympu em thung ya ki.
Da ong u wa katkam wa man kattæ em chiboon ki kreh wa lait khamtam hapoh ka chnat Health kiwa ym em u lai katkam ki kyndon thung kreh heiwa ym em u bood næ lai lyngba ka DSC hawa thung kreh ki chnat.
Chooh chooh da ong u wa em da ki spah tylli ki kreh wa lait ya kiwa da thung sopsop iwa da ktah ya ki khynroo khyllood wow yoh yei hok yong ki wei da dawa na u DC wow pynmih ya kini ki kreh wa lait ha ki chnat waphær waphær khnang wow yoh u Advertise ya ki.
Da maham u leh wa lada ymye u pynmih næ pynbna ya ki kreh wa lait, neiliang ka Party daw lai ko chaphrang wow yoh ki khynroo yei hok yong ki, deiwa pynrap leh wa u DC da paan por u hadooh ka 30 tarik uni u bnai June wow leh yeiwa emkaam hajrong ini.
Hawa kylli ya ki chnat wa thung kreh sopsop, u Andrew da ong u wa boon ki chnat wa thung kreh sopsop heiwa na kini kiwa boon dooh toh ha ka Health Department kawa ym jooh phah cha DSC da boon tylli ki snem khamtam ki kreh ha ki kyrdan Grade IV.
Neiliang u Andrew da kyrpaad u ya ka DSC wow chimkhia yeini i thung kreh sopsop ha chnat Health khnang wow yoh ki khynroo yei hok wa da chah kyntait ki.
Discussion about this post