Ka Meghalaya State Legal Services Authority (MSLSA) deilang ka District Legal Services Authority (DLSA), East Khasi Hills deiwa ya krehlang wa ka sorkar Meghalaya, ha ka 14 tarik da sdang ki ya ka Project ‘Ka Jingkyrmen (Hope)’, kam chibynta wow yada ya ki khynnah kamjooh wow pynsñiawthooh ya ki aiñ wei wow pynkhlan leh ki laad yada hapoh ka aiñ Protection of Children from Sexual Offences (POCSO) Act, 2012.
Hapoh kani ka Project u lai pynsñiawthooh ya ki khynnah, ki manbei manpa, kiwa chong chnong yeiwa emkaam u yada ya ki khynnah kamjooh i hok yong ki katkam wa da e da ka aiñ.
Ha kani ka sngi da emlang ka Justice Revati Mohite Dere kawa man kam ka Chief Justice ka High Court ka Meghalaya kawa man leh kam ka Patron-in-Chief ka MSLSA, kawa da ban joor yeiwa emkaam u lai pynsñiawthooh ya ki kyndon ka aiñ POCSO Act khamtam ya kiwa dang khai khynroo wa ki khynroo.
Da ong ko wa da yoo ko wa kiwa boon kiwa dang khynroo ym tip ki wa i ya thiah ya dem kam ki chi kurim kamjooh i yachong kurim dang hapoh 18 snem man ko pyrchah ya ka aiñ POCSO Act hanla leh yeini dei mon laitlooid khlem da pynbor leh heiwa ka aiñ daw pynchitom ko.
Da ong ko wa hei chem hawa bichaar ya ki mutkotduma kini ki kaam jooh jia ki ha kiwa dang yalang chan, em ha kiwa dam skur chiteiñ por hadooh wa poi chei chah kem i chah kset iwa da ktah ya ka mynried kini kiwa dang khynroo.
Neiliang u Pravin Bakshi, Commissioner and Secretary, Social Welfare Department ka sorkar deiwa e nongmuna yeiwa boon ki POCSO Case hadooh 29 tylli ha Mawlai Block wa 26 tylli ha Mawryngkneng Block, da ong u wa kini toh kiwa ye wow yada lada pynsñiawthooh paidbah.
Da pyntip u wa neiliang ka Social Welfare Department da pynkrehkaam ko ya ka Mission Vatsalya kawa e yada ya ki khynnah kiwa da maad yei eh i chitom deiwa pait wa sumaar ki kamjooh wow e yada nadooh ya kiwa chah thombor, kiwa chah ieh beiñ, ki khonswet, kiwa wiar na yung wa kiwi de.
Da pyntip u leh wa ya u Child Helpline katni da ye wow pynemkaam deiwa Phone ha u Emergency Response Support System (112) wei u Women Helpline toh u 181 yow e yarap. Wei hapoh kani ka Project daw lai pynche leh chaphang u Legal Services Helpline (15100), u Cyber Crime Helpline (1930) wa u Police Emergency Helpline (112).
Discussion about this post