Amlarem: Ka North Eastern Electric Power Corporation Limited (NEEPCO) ynne ka sngi da pynman ko yaka prokram pynem warom yei dap 3 snem pura i krehkaam ka sorkar NDA hapoh i yah khmat u Prime Minister ka ri India u Narendra Modi wada tip kam ka Sabka Saath Sabak Vikas Sammelan ha Enowel Hall Amlarem Civil Sub-Division West Jaintia Hills District.
Da sdang ya ka yalang pynem warom dei ediñ yaka charak wada chimbynta da u kongsan u Bhabesh Kalita Hon’ble MLA ka Assam, hei emlang u state President BJP u Shibun Lyngdoh, ka MDC ka Khliehriat kong Voilet Lyngdoh, MDC ka Jowai North u Marki Mulieh, wa kynthup ya kiwi won ki dkhot ka BJP u Singh Mulieh wa kiwi kiwi wei da yoh leh i klam pdiang burom na u Junior Lamin President BJP Mandal 7 Amlarem.
U Shibun Lyngdoh, State President ka jylla hei klam yong oo da ong u wa du haki 3 snem, ka sorkar NDA hapoh i yahkhmat u Narendra Modi da ye ko u chna hadooh kamwa 104 tylli ki policy wow e i roi i paar cha ki paidbah, iwa kynthup yei wanrah ko ya ka thong i khooid i jngiar lyngba ka Swachh Bharat Abhiyan, da pynheh archah i nongsngi kiwa kreh haka skhim MGNREGA, da chim ya ka rai wa paka wow pyndooh ya i baamtooh lyngba ka Digital Transaction, neibhah boon kiwa kreh sorkar chim kabu ki nalor wada su tulop ya ki, da ye leh u pyndooh yaka poisa T. 500 wa T. 1000.
Neitæ da phah wow wai ya ki Zero Balance Bank Account khnang wa waroh i yoh myntoi naka sorkar u psiah ki sak ha ki account kiwa yoh myntoi yow doohjait i baamtooh. Da batai u leh wa da em ki kattu katni ki Insurance ki Subsidy wa ye ki paidbah u yoh myntoi lada chah pynsih i rep i riang hei bor ka rymaw, da pyntip u leh wa da wai ya ka Skill India nei bynta ki khynro khyllood kiwa duh khih dooh kreh.
Yow yarap ya ki man yung wa dooh, da pyntip u wa ka sorkar bei da dep wai ko yaka Amrit Pharmacy ha NEIGRIHMS heiwa na i dor wa toh u thied T. 100 ki dawai u yoh du hapoh 25 tyngka, neitæ ong u wa da dep phah ya ka sorkar jylla leh u wai ko ya ki Amrit Pharmacy ha man ki Hospital ki CHC tangwa sñiawsih wa neiyi i daw hadooh hynne ympu em chim ka sorkar jylla ya kani ka scheme, da ong u leh wow yarap yaki manbei hei kha khon da pynbiang ka sorkar bei T. 6000, kamtæ da kylli ya ka sorkar congress neiyi i daw ym em pynyoh ki cha ki paidbah ya kiwa boon ki scheme wa da e ka sorkar bei.
U K.C.Boro u MLA warim na Garo Hills da ong u wa hei yahkhmat u Narendra Modi du hapoh 3 snem da man iwa phylla wa da ye u wanrah hadooh 107 tylli ki scheme yarap næ e myntoi neibynta kiwa dooh tangwa ha Meghalaya ym em yoh lut ki ka kat wa toh ka Sorkar Congress wa synchaar kawa heh du i baamtooh donhi.
Ha kani ka sngi da pdiang burom leh cha ka party ya u R.L. Tariang MLA warim ka 7-Amlarem uwa da khana leh wa nachwa jooh em u haka UDP wei yei daw wa yut u toh i daw samen. Da khana u wa iwa pynman ya oo u psiah u cha ka BJP toh wa yoosuk u ya ki policy krehkaam yong ka hapoh i yahkhmat u Prime Minister ka ri, iwi leh toh wa yoo u ka policy krehkaam yahaap bha ko wa ki khynroo khyllood ka juk wa katni kiwa em hapoh 35 snem.
U Marki Mulieh BJP President West Jaiñtia Hill uwa jooh em haka UDP khana u i daw wa psiah BJP u toh hadien wada bichaar bniah wei chong pyrkhat u wei wa yoo u wa ka BJP donhi ka luti wa biang u wanrah i roi i paar haka imlang sahlang.
Da pynyoo leh yaki phlim i krehkam ka sorkar NDA ha kini ki 3 snem wada pynkhreh daka NEEPCO.
Ha kani ka sngi neiliang ka BJYM Amlarem leh da chim ki ya ka kabu wow pynkup burom ya kitu kiwa da poi chakhmat haka result SSLC yong uni u snem.
Da pynchongchit ya kani ka sngi dei rwai i chaad tynre naki khynroo khyllod Ialong, Jowai, wa kiwi.
Discussion about this post