Jowai: Hadien wa pynbna u Skindro Dkhar ynnin wow yieñ u kam u kyrtong MLA naka Sutnga-Saipung Constituency deiwa ieh u yei kaam sorkar wa kreh u kam u UDA hapoh ka yungkrehkaam u DC ka East Jaiñtia Hills, ym em man u samen wa da leh ya ini heiwa u Naikhynde u Lakhon Biam uwa kreh kam u Assistant Executive Engineer ka tnat PWD da ieh u yei kaam sorkar yow yeiñ yaleh Election na ka Raliang Constituency.
Kiwi kiwa da ieh yei kaam sorkar kynthup ki hadooh kiwa da ksoh kyrdan IAS wa kynthup ya u Secretary In-charge ka Health and Family Welfare kamjooh wa man u Director ka Social Welfare u Himalaya Shangpliang uwa da chim ya ka Voluntary Retirement yow chong ngiah noh na i kreh.
U Shangpliang daw yieñ u na ka Mawsynram Constituency kawa man leh ka Constituency u Pynshngain N Syiem uwa man kam u MLA kamjooh u CEM ka KHADC.
Ha Mawsynram daw em leh sa uwi u sahep sorkar ka tnat Agriculture u Olanding Suin uwa daw yaleh na ka UDP.
Sa uwi u sahep sorkar uwa man kam u Director ka Commerce & Industries u Nehru Suting daw yaleh u na Pynursla Constituency pyrchah ya u Prestone Tynsong.
U Nehru kamwa ong kiwa boon toh uwa ya jan bha wa u Dr. Mukul Sangma wei ye u yaleh kam u kyrtong Congress.
U Jopthiaw Lyngdoh won uwa da chong ngiah kam u IAS daw yaleh election u na ka Constituency u Sniawbhalang Dhar.
Ka Ferlin CA Sangma ka Joint Secretary wa rim ka Printing and Stationery, da chim ko ya ka Voluntary Retirement yow chong ngiah yow yakhun Election. Ka daw yakhun ko pyrchah ya u Montri ka jylla u Clement Marak na Selsella Constituency, West Garo Hills kam ka kyrtong NPP.
Sa uwi u sahep sorkar u na ri-loom Garo, u B. Ch. Hajong daw yieñ u pyrchah ya u Montri Rangbah ka jylla na Ampati wei ye u leh u yieñ kam u kyrtong BJP.
Kattu dang sah sa du kattu katni bnai chwa wow sdang ka Election daw em chooh mai-ai ki wow ieh kreh sorkar wow yeiñ Election.
Discussion about this post