U Montri Rangbah ka jylla, u Conrad Kongal Sangma da ong u wa ka sorkar jylla da yoh ko boon i kyrchaan na kiwa boon ki liang neibynta ka rel kit maar ha ka thaaiñ Khasi-Jaiñtia Hills, heiwa da ong u wa ka sorkar ka ye ko wow wanrah ya ka rel kit maar kam i sdang.
Da ong u wa phang wa yatoh wa i wanrah ya ka luti rel toh kawa da sahteiñ da slem, deiwa pynrap wa hachwa wow wanrah ya ka luti rel emkaam wow ya syllok chwa wa waroh ki kynhun, khnang wow em i sñiaw chngaaiñ.
Kam wow pynkynmoo wa ki seiñbhalang ha ka jylla ki yieñ pyrchah bait ki yei wan ka luti rel ha Meghalaya, deiwa pynsñiaw yei tieñ yei wan buhai chnong yong ki bru kiwa na baar ka jylla.
U Montri Rangbah da ong u wa ki paidbah ka jylla toh u sñiawthooh ki yei yarap lada wan ka luti rel, deiwa pynsñiaw leh wa ka jylla da yachem ko yei eh ha u snem wa da dep nei wan ka khlam COVID 19.
U Conrad da ong u wa ka khyrdop kawa em ha Umling, Ri-Bhoi District da booh khnang neibynta wow pynrkhiñ ya i psiah ki bru wa na baar ka jylla, wa kawi kawa ha Mendipathar, North Garo Hills kawa da hoi wow wai noh.
Hawa klam won hajrong wa pynlait yaka kot lakdop “Meghalaya on the move” kam i lehkmen dap 3 snem i lai luti yong ka sorkar Meghalaya Democratic Alliance (MDA), u Conrad da ong u wa u snem 2021 u man u uwa emkaam bha neibynta wow pyndep ya kiwa boon ki kaam yong ka sorkar.
Hawa kylli hajrong i wym khooid i rukom pynkrehkaam ya ka Scheme MGNREGA, u Montri Rangbah da kyntait u wa em i wym khooid i krehkaam, deiwa ong wa waroh i kreh lai bait ki, lym kamtæ kammon ka jylla u yoh ko hadooh T. 1600 klur ka mang tyngka du neibynta ka MGNREGA, heiwa da ong u leh wa ka jylla Meghalaya ka em ko hei kyrdan kawa 3 napyrdi ki jylla wa pynkrehkaam bha ya kani ka Scheme. Katwa ka Assam kawa heh kamwa chiphaw chah ya ka Meghalaya da yoh ko du T. 2000 klur neibynta wow pynkrehkaam ya ka MGNREGA.
