15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Boon kiwa thap vote bar ya kiwa chong chnong ha East Jaiñtia Hills District

0 Comments
Advertisement ad1
Advertisement ad1
Advertisement ad1

Jowai: Chi bynta yong ka Special Drive Campaign wow pynpsiah pyrtuid hapoh ka electoral roll ya kitu ki khynroo khyllood wa da dap 18 snem chaneiñ, katkam wa hukum ka Election Commission yong ka Ri India, u S.S. Syiemlieh MCS ADM uwa pait ya ka tnat Election East Jaiñtia Hills District Khliehriat, hei yaklam wa kiwa pathai khubor da khana u wa hapoh East Jaiñtia Hills District hi ki bru wa da em 18 snem hadooh 80 chaneiñ rap boon ki nongthap vote ban ya ki wa chong chnong tangwa lada pait won hapyrdi i rta 18, 19, 20 won duna ki wa pynpsiah pyrtuid, i daw hi toh wa kitu wada yap ym em wa e yutip ki seiwi leh uwi u bru pynpsiah pyrtuid u haki ar thaw.

Da khana u leh hawa nujor yaka Data Base ka Electoral Roll wa ka boon bru (Population) ki khynroo khyllood ha pyrdi i rta 18 hadooh 20 snem chem wa duna ki hadooh 2 hajar tam kiwa pynpsiah pyrtuid, tangwa lada pait won ya i rta kiwa 29 hadooh 30 tam kamwa 6 hajar tam ha waroh artylli ki constituency.

Advertisement ad1

Haka 5 Sutnga Saipung constituency da chem wa hapyrdi i rta 30 hadooh 39 snem ki thaiñ wa boon ki wa thap vote ban yaki wa chong chnong toh ka Narwan A, Umkyrpong, Thuruk, Musiang Lamare (old), Sakhain Moolinen,Huroi, Wahiajer (Narpuh), Tongseng (Sutnga), Muliat Sumer waka Jalaphet Sutnga A, katwa hapyrdi i rta 18 haduh 19 snem ka Sutnga Pohskur, Moolamylliang, Khahnar, Mynthlu, Jalaphet Sumer, Lelad waka Moulian duna kiwa wan pynpsiah pyrtuid heiwa du 28% naka 44% i boon bru.

Haka 6 Khliehriat Constituency hapyrdi i rta 30 hadooh 39 ki thaiñ wa boon ki wa thap vote yaki wa chong chnong toh ka Moolamanoh, Byrwai, Rymbai, Pohskur, Lum Shyrmit, Pamra Kmai Shnong, Rngat, Lumshken, Nongsning, Wapung Skur B waka Khliehriat West B, katwa hapyrdi i rta 18 hadooh 19 kiwa dang pynpsiah thymme da chem wa ha Tuber Shohshrieh, Moolamanoh, Lumshyrmit, Sohkymphor Pohshnong, Mukhaialong, Mutong waka Umsatai ki wa pynpsiah pyrtuid poi ki du 16% naka 32% i boon bru.

Katkam i thooh bniah ki BLO da chem wa ki thaiñ wa boon ki wa thap vote ban yaki wa chong chnong toh wa em pyrtuid haki ar thaw wei kamjooh ym em e yutip ki ya kitu wa da khlaad.

Da ban chooh chooh u deiwa ong wa katkam i kwah hi ka tnat Election East Jaiñtia Hills District, uwon uwon næ kawon kawon wa da dap 18 snem chaneiñ ymtoh de u chah ieh ki charood ka Electoral Roll, kamtæ hajrong kani ka thong natlor wa da pyndep ya i pynpsiah pyrtuid haki thaw ki skur waphær waphær daw em won sa ka Special Campaign ha kani ka 22 tarik ha man ki Polling Station, heiwa ki 120 ngut ki BLO u lai ki ha man ki Polling Station yow pynpsiah pyrtuid ya ki khynroo khyllood hapoh ka electoral roll ya kiwa da biang i rta deilang ki kot pynsakhiat yei rta.

Hei yatoh won wa kitu ki khynnah wym em lai skur haki thaiñ nongkyndong da pyntip u wa du ki Bei ki Pa næ kiwa ri wa pait yaki donhi wa ye u pynsakhiat yei rta yong ki.

Kamtæ da kyntu u yaki wa chong chnong u wan ki chakhmat wow li mih ha ki polling station yong ki haka 22 tarik yow pynpsiah pyrtuid ki neibhah ka Ekection Commission ka Ri ong ko wa uwi pa uwi uwa chong chnong ka Ri toh u yoh ki ka hok chim bynta haka sngi thap vote.

Ha kani ka Special Campaign daw em leh i pynbait yei bakla, daw pyndooh noh yei pyrtuid kitu wa em ar thaw kamjooh u pyndooh noh yei pyrtuid kitu wa da khlaad.

Share this:
Previous

Da yaleh ka DoNER katwa ye wow pyllai bait ya ki scheme yong ka: Dr. Jitendra Singh

Next

Hapoh ka 28 tarik dawa ka JSU wow pdiang ya ki khynnah wym yoh admission ha KNGC