Boon wa chah kyntait ki phang dawa ki wakreh 108 haka Special Committee

Shillong: Ka Meghalaya EMRI Workers Union (MEMRIWU) da chong yalang ko kawa nongkong deilang waka Special Committee kawa da thung da ka sorkar wa da khlieh da u Commissioner & Secretary ka chnat ka chait ka khiah, u Pravin Bakshi wow pait yei eh i khoo ki wakreh ka GVK 108 ynnin ka 25 tarik ha Conference Room yong ka DHS, Shillong.

Ha kani ka yalang kiwa yahkhmat na ka Meghalaya EMRI Workers Union (MEMRIWU) da pysñiaw ki yei wym sñiawhun neidaw wa ki phang wa dawa ki, boon da chah kyntait ki.

Hawa yaklam wa kiwa thoh khubor, u President ka MEMRIWU, u Roypar Kharraswai da pyntip u wa ha kani ka yalang da yaklam ya ki soo tylli phang wa kynthup ya i pynbiang ya ki wakreh, ka tulop, ka chuti wa i chah kyrriah kaam.

“Ya ka dawa wa toh u su katkam ka yurim wa biang katkam ka kaam wa leh ki næ ka Equal Pay for Equal Work, tangwa neiliang ka sorkar wa ka Company da kyntait ki, i da dawa toh wow pynku archah yaka tulop, tangwa ya ini ka Compan da kyntait ko deiwa ong wa ka ym haap ko hapoh ka aiñ Labour Act waka Establishment Act,” da pyntip u Kharraswai deiwa pynrap wa da dawa ka seiñ toh u yoh ko da i thoh hajrong kani khnang yow tip ko u leh ya iwa emkaam.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kawi won kawa yaklam ha kani ka sngi toh yei chah kyrriah kaam heiwa ya ki Khasi toh u booh cha ka thaw Khasi wa ya ki Garo toh u booh cha Garo, tangwa ya ini leh ym em pdiang.

Hajrong won i dawa wa toh u pyndooh noh ya ka Contract waka ka sorkar wei yow pait noh daka sorkar yaka 108, ya kani leh da chah kyntait deiwa ong wa lada ka sorkar pyndooh syndon ko yaka Contract wa kani ka Company, waroh ki wakreh ha kani ka kaam daw dooh kreh noh ki.

“Ka yakhih ka Union toh hajrong wow pyndap pynbiang ya ki duna ha kani ka chnat neidaw i leh habra ki bor wa toh u pait, tangwa lada ka sorkar u poi ko cha u pood wow khang syndon toh u pyrkhat arsien ko neibynta ki paidbah,” da ong u.

U Kharraswai da ong u wa ka Union ka yieñ ko ha ka yurim wow pynbha chooh chooh ya ki hok u paidbah ym toh wow pyndooh yei hok u paidbah nadooh uwa khian hadooh uwa heh wa khroo neidaw hadooh ki heh ki haiñ leh ki ym lait ki khlem pynemkaam ya kani ka chakri paidbah ha ka por wa wan ka chitom. “Lada kiwa pynlai kiwa toh yong ka Company kawa na baar ka dang leh habra ko ya ka chakri cha u paidbah, rap bha wa ka sorkar u chim ko ya ka rai hajrong kani ka Company,” da ong chooh chooh u.

Also Read: Pyndam noh ki wakreh ka EMRI ya ka yakhih