theme-sticky-logo-alt
theme-logo-alt
Advertisement ad1
Advertisement ad1

Cha Delhi lai u Banteidor yow paan ya ki dawai sboh wa da dai duna dor da 50%

Advertisement ad1

U Montri wa pait yei rep i riang ha ka jylla, u Banteidor Lyngdoh da pyntip u wa ka chnat Cooperation ha ka 25 tarik uni u bnai da pynmih ko ya ka Office Order neibynta ki warep kiwa toh u yoh yei sboh dawai lyngba ka MECOFED deiwa e hei dor wa da pynduna (Subsidy) kawa man 50% na i dor wa da booh.

Ha ki kajiak sngi wa da dep, u Banteidor da lai hi u cha Delhi heiwa da e kti dei thoh cha u Montri sorkar India wa toh u pait ya ki kaam rep, u Narendra Singh Tomar wow pyntip leh wa ka sorkar Meghalaya lyngba ka chnat rep da pynmih ya ka Office Order ha ka 9 tarik uni u bnai wow e laad ya ki warep ha ki kattu katni ki thaw wow yoh pynemkaam biang yei dawai sboh hadien 8 snem tam wa da khang ya ka Subsidy neibynta i dawai sboh nadooh u snem 2014.

Advertisement ad1
Advertisement ad1

Hei lai cha Delhi u Montri ka jylla da pynsñiaw u wa ki warep chem chitom ki hadien wa pynkut noh ya ka Subsidy dawai sboh, wei hei thoh wa da e cha u Montri ka sorkar pyrdi da booh lang yei bhah wa i emkaam yong i dawai sboh ha ka jylla kam ka Urea, DAP, MOP, SSP wa kiwi de.

Ini i lai u Banteidor cha Delhi toh du hadien chi sngi hadien ka yalang pynche wei pynsñiawthooh paidbah yei e laad biang ka chnat wow pynemkaam dawai sboh kawa da pynmanlang wa ki warep wa kiwa yahkhmat chnong ha Mawkatheiñ.

U Banteidor da ong u wa i dor dawai sboh da sy’at palat, wei ya ini da pyntip leh cha u Montri Rangbah ka jylla, u Conrad K Sangma yow ye yarap neibhah wa dang chem chitom ki warep wow thied yeini. Da ong leh wa i bhah yoh dawai sboh ya ka jylla ka duna bha hawa nujor wa kiwi won ki jylla katwa i dor won da sy’at palat.

Neiliang u Banteidor da kyntu u ya ka sorkar jylla wow e laad ya ki warep lyngba ka Subsidy wei ka chnat ka Cooperation da pynmih ko ya ka hukum ka wow pynmyntoi ya ki warep kiwa chim dawai sboh lyngba ka MECOFED. Da pynsñiaw u yei e khublei ya ka sorkar jylla kawa da chimkhia ya ini wa emkaam ki warep ha kawa ka chnat Corporation da pynmih ko ya katai ka hukum.

Puræ leh: 50% u dai duna dor yei sboh sorkar cha ki warep

Share this:
Previous

Da thung ya u Justice Uday Umesh Lalit kam u Chief Justice wa 49 ka ri

Next

Shillong Premier League 2021-22: Jop ka Ryntih ya ka Nangkiew Irat