U MLA samen na Nongkrem uwa man leh u Chairman ka Meghalaya State Planning Board, u Lambor Malngiang da beiñ joor u yei leh embor ki chipai ka GTC ynnin ka sngi ha ka chnong Mawshbuit, kawa da wanrah leh ya i mynsoo ya ki 4 ngut ki dkhot yong ka KSU.
U Malngiang da ong u wa neiliang yong oo u chimkhia u ya ini i kaam deiwa daw rah wow yaklam cha ka Defense Ministry hajrong i leh embor wa i pyndik ki chipai ya kiwa chong chnong.
Da ong u wa ini i leh embor ki chipai ym toh iwa jia ha i sien wa nyngkong, heiwa da pynsñiaw u yei sñiawkhia wa hadooh katni ym pu ye wow pynbait ya i eh na i kam thaw wei kaap pood ki chipai ha ki thaw paidbah.
Da pynsñiaw u leh yei emkaam jhan wow pynbait ya ini i eh wa ki paidbah yachem ki, deiwa pynrap wa ki chipai ym ye ki wow chim ya ka aiñ ha kti, heiwa da pynrap wa ya ini i kaam da emkaam wow yaklam bait noh wa u Union Defense Minister, wei da ong chooh chooh u wa kopsar sñiaw ki wa kiwa chong chnong ka jylla toh ki bru loom kiwa doom, tangwa ym tip ki wa em ki laad yaleh wow lai chadooh cha Delhi.
Ha i jooh i por da ong u wa daw khut smat ya ka yalang wa ki bor pynlai District yow paan pynche hajrong itai i jia.
U MLA da ong u leh wa nadooh i por yong ka sorkar Assam katai ka surok ha Mawshbuit da em ko wei da tip ya ka kam ka Village Internal Road, heiwa da ong leh wa ka sorkar daw hap ko wow pynbiat yei rukom khang ya katai ka thaw, neibhah kammon ya u sarok wa pait da ka PWD dang nood wow leh tre da ki chipai.
Hawa yatoh wa i jia ynnin i janmiet wa da mih i kulmar, da ong u wa ki chipai toh u pyrchang ki wow pyndooh yei huri hura, tangwa kamwa da oo, hadooh wa poi ki khynroo cha Hospital da pynyoo wa ki da sei ki da ki tiar pynmynsoo.
Ha iwi i liang u Malngiang da ong wow kyrriah ya ki chipai na sor Shillong ym toh iwa suk neibhah emkaam da ka Resolution hapoh ka Asssembly wei da eh hi wow kyrriah tangwa iwa emkaam katni toh wow wanrah yei yatoh hapyrdi ki chipai wa ki paidbah.
