Ka Khasi Hills Autonomous District Council (KHADC) da rai ko wow phah noh chwa ya ka Khasi Hills Autonomous District (Khasi Inheritance of Property) Bill, 2021 næ ka Bill neibynta wow pynyoh lang kamjooh yei em yong ki bei ki pa ya ki khon Khasi wa pura cha ka Select Committee hadien wa da mih i dawa na ki MDC ka Congress wa em ha ka Liang Pyrchah ha ka sngi kut yong ka dorbar tlang.
Ya kani ka Select Committee daw khlieh da u Chief Executive Member (CEM) ka KHADC u Titosstarwell Chyne, katwa u Secretary ka Executive Committee u G. Syiemiong u man u kam u Member Secretary.
Kiwi de ki dkhot yong kani ka Committee u kynthup ki ya kiwa yahkhmat ka Liang Pyrchah u PN Syiem, u MDC na Mawhati u Charles Marngar, u MDC na Mawkyrwat u Carnes Sohtun kiwa toh na ka Congress, u Paul Lyngdoh uwa man u EM ka KHADC wa u Lamphrang Blah, MDC ka NPP na Mawphlang.
Ha chwa ini, u MDC ka Congress na Nongstoiñ u Gabriel Wahlang da wanrah u da ka Amendment Motion wow dawa wa ya kani ka Bill toh u phah chwa cha ka Select Committee neibynta wow pait wei bichaar bniah.
Neiliang ki MDC ka Congress da pynsñiaw wa man iwa eh wow yatai ya phyllu hajrong kani ka Bill neibhah ym da yoh yei por wa biang wow puræ thij pa thij wei da chem leh wa em ki bynta kiwa hap wow pynbait.
Hawa klam cha kiwa thoh khubor hadien wa da wai i chong dorbar, u CEM da ong u wa i dawa yong ka Liang Pyrchah toh kawa em yurim neibhah wym em da yoh boon i por wow puræ bniah ya ka Bill neibhah ya ka Bill da saam cha ki ha ka sngi nyngkong ka tayaw.
Da ong u wa i chim rai wow phah ya kani ka Bill cha ka Select Committee daw e chiboon i por na i bynta ki MDC wow pait thij pa thij wei wow e yeiwa sñiaw yong ki.
Da ong u wa i yachem wa nyngkong yong kani ka Committee ye ko wow man ha ka tayaw wow wan.
“Nga ym kwah O wow yoh yei mynjur kawa smat smat ha kam ini i por neibhah wa toh ka bill kawa emkaam bha kawa yatoh wa ka riti dustur yong u Khasi,” da ong u CEM.
Da ong u leh wa ka Select Committee daw paan ko leh yei e yumut wa i sñiaw yong kiwa yahkhmat chnong, ki seiñ waphær waphær kiwa em i sñiaw hajrong ka riti dustur yong u Khasi wei najrong ini daw paan leh yei e yumut na ki bru wa stat aiñ hajrong kani ka ka Bill.
Chooh chooh da ong u wa i thmu hi wa hakhmat yong kani ka Bill toh hei rukom yoh pateiñ wei i em yong ki bei ki pa, khamtam neibynta kitu kiwa em du ki khon chynrang wa ki wym em khon, tangwa ym mut won wa toh u leh bait kamtæ wow saam bhah mar katjooh ya i em neibhah ini waroh chong ko hei mon laitlooid yong ki bei ki pa.
Ha iwi won i liang, da ong wa ym kwah wa ini i kaam u chim boon yei por tangwa yow yoh u wanrah biang ya kani ka Bill ha ka chong dorbar kawa daw man.
