U montri rangbahdooh ka ri, u Narendra Modi ynnin ka sngi hawa e i klam ha ka United Nations Economic and Social Council (ECOSOC) da ong u wa ka India kheiñkor wei chimkhia bha ko wow wanrah yei chongsuk ha waroh ka pyrthai, wow pynku yei khayi pateiñ, i yada rymaw wei wa ka India u kyrchaan bha ko ya ka United Nations (UN).
U Modi da ong u wa ha ka khlam u COVID-19 da yoo hadooh katwon chem chitom ki ri ha ini i yakhun tangwa ka India da pynman ko ya kani ka yakhun ki paidbah chirup wa ka sorkar wa ka imlang sahlang.
Da ong u leh wa ka India da embynta bha ko u yarap ya kiwi ki ri lada em i khih khmi, æryong, ki kjut chitom, wa kiwi kiwi wei khamtam ha ka yakhun ya u COVID-19, ka India da e yarap wei da phah dawai ko cha ki 150 tylli ki ri.
Chooh chooh da ong u wa ka ri booh thong ko wow pynwiar ya ka kjut Tuberculosis chwa u snem 2025 wei ini daw yarap i ya kiwi ki ri ka pyrthai deiwa knær ka India ya ki kti yarap yong ka.
U Modi da pynkynmoo u leh wa ka India man ko kawi na ki 50 tylli ki ri wa sdang ya ka United Nations mar kut ka thma bah wa ar.
Da pynrap u deiwa ong wa da em chiboon i kylla ha ka UN kawa kynthup ya ki 193 tylli ki ri kam ki dkhot wei uni u snem u man ka lyngkhooh snem wa 75 nadooh wa sdang ya ka UN.
