U Symbood Montri Rangbah ka jylla uwa pait ya ka chnat PWD (Roads), u Prestone Tynsong da khana u wa ki bor pynlai District daw ujor ki cha ki bor ka aiñ hajrong i oor khyndaw ha riat Rngaiñ wa em ha luti Shillong-Pynursla-Dawki, heiwa da chim leh yei mynsien bru.
Da ong u wa ka mukotduma hajrong itai i jia daw leh hajrong i kreh khalær ya i kaam wa da wanrah ya itai i jia, wei da pynrap u wa hadooh kattæ ym pu ye wow batai yei daw wa da pynman ya ini wa jia, lada toh iwa leh ka NHIDCL lane na ka Company wa pynkreh ya u sarok, ka ARSS Infrastructure Projects.
Da ong u wa lada chem ya iwon iwon i daw wa da pynjia ya ini, ka aiñ daw pynchitom ko.
U Symbood Montri Rangbah da lai pait u leh ya itai i thaw wa oor ha Rngaiñ ynne ka sngi, wei da phah u leh ya ka Company wow wan yah ya ki bru chemphang ha kini ki kaam mynstep ka sngi wow pait bniah ya katai ka thaw khnang wa kam itai i jia ym jia de hadien habood.
Ha ini i lai pait da emlang leh ki sahep sorkar nadooh u SP ka EKH, ka SDO ka Pynursla Sub-Division wa kamjooh ki heh yong ki Company wa pynkreh ya utai u sarok.
