Cha u Dolloi ka Elaka Jowai wa u CEM ka JHADC lai ujor ki paidbah wa chong chnong ka Ummulong pyrchah ya u Waheh Chnong

Jowai: Kiwa chong chnong ka Ummulong ynne ka sngi da lai ujor ki ha khmat u CEM ka JHADC u A. Shullai wa ha khmat u Dolloi ka Elaka Jowai u Puramon Kynjing pyrchah ya u Waheh Chnong ka Ummulong u S.S. Langi deiwa kam ki wa da yahbakla u ya ka yungkrehkaam u Dolloi kamjooh ya ka JHADC deiwa kyntait u pynman Dorbar Chnong ha ka 28-09-17 deiwa e daw wa da dep pynman dorbar la le sieñ ha u Naikhynde wei ki paidbah leh ym em kwah ki ka.

Kiwa chong chnong da pyntip ki wa ki tarik 01-09-17, 06-09-17 wa ka 21-09-17 wa kam u Waheh Chnong wa pynman Dorbar Chnong toh ki tarik wa pynman ya ka Social Audit neibynta ka MGNREGA ha ka chi tarik, ha ka 6 tarik toh ka Public Hearing katwa ha ka 21 tarik toh ka yalang wa khut yow yaklam chaphang wow pynkhooid chnong.

Kamtæ kiwa chong chnong da ong ki wa kini ki le sngi ym ye u kam toh man ki ki Dorbar Chnong wei ya ka Dorbar Chnong hi ym em de u yoh ya ka la 3 snem kattu.

Neiliang u CEM leh da mynjur u wa ymye u kam ya kam kini ki yalang wa pynman wa toh ki Dorbar Chnong neibhah katkam ka aiñ ka JHADC toh u yohbor na ka JHADC chwa wow pynman Dorbar Chnong tangwa kini ki yalang toh wa pynman da ki bor district wei i kyntait u Waheh Chnong u pynman ya ka Dorbar Chnong katkam wa phah u Dolloi da pynyoo wa ym em burom leh ya ka Council.

Related posts

Wa thung ka BJP da ki bru yong hi tæ mih i kynrum kynram ha NEHU: Ronnie

November 15, 2024

Dang jan u lai na Shillong cha Vietnam, Thailand, Laos, Cambodia wa Burma bar cha Delhi: Conrad

November 14, 2024

Katkam ka aiñ ka JHADC toh u pynman Dorbar Chnong ym duna ya ka 3 sien chisnem wei lada ym wan chiteiñ ki paidbah wa chong chnong haap pynman biang ya ka.

Kamtæ u CEM da kular u wow chimkhia ya ini wei da kyntu u ya ki wa wan ujor wow yaichah ki neibhah katni ympu yoh u chna ya ka Executive Committee wei daw chimpor sa kamwa chi tayaw ar tayaw wei daw chong pyrkhat hapoh ka EC ya waroh ini.

Neiliang u Dolloi won da ong wa daw khut u ya u Waheh Chnong, u Chairman Chnong wa u Secretary Chnong yow yaklam chaphang ini i kaam wei wow pyntikna leh ya i pyrtuid kiwa em kamwa 200 ngut kiwa soi ya ka chithi ujor yow pyntikna kiwa ran dien leh ym em de ki neibhah ong u wa da em kiwa thoh cha oo wa ym emkti ki wa kini kiwa pyrchah waheh chnong.