Chadooh cha Supreme Court maham ki 6-Chnong wow ujor pyrchah yei tih moochuni ka Star Cement

Shillong: Ka 6-Shnong Wah Lukha Association deilang waka Sonapyrdi Tourism and Economic Development Society (STEDS) da maham ki wow ujor chadooh ka Supreme Court lada e laad ya ka Star Cement wow lai ko chakhmat wow tih moochuni ha Brichyrnot, East Jaiñtia Hills.

Kini ki ar seiñ da pynsñiaw ki leh yei pyrchah ya ka Public Hearing yow paan bor u tih moochuni ka wow pynman haka 19 tarik uni u bnai.

“Nadooh wa wan ki Cement Factory ym jooh yoh myntoi ki chnong, katkam ka Industrial Policy, kitai ki Company toh u e kaam ki hadooh 60% ya ki tre chnong, tangwa hadooh katni ym yoh ya ini hanlada da kular nadooh u snem 2010, i em kini ki karkhana la 10-12 snem ym e myntoi ko yaka thaaiñ,” da ong u Daïapherbha Lamare hawa klam wa kiwa pathai khubor ha nongbah Shillong.

Da ong u wa ka 6-Shnong Wah Lukha Association daw pyrchah joor ko yaka Public Hearing deiwa ong leh wa u montri rangbah, u Conrad K Sangma da jooh ong u wa ka sorkar yong oo u pynku ko ya ki kaam uiñke suwari yow yoh kaam ki khynroo khyllood tangwa ini kopsar toh du ha Shillong donhi katwa ya i pynsih yaka rymaw ym em pyrkhat u, da pynbaad u Lamare.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

“I ki paidbah yong kini ki 6 chnong kiwa em hajan ka Brichyrnot u yieñ bait i hadooh wow yahun chadooh ka Supreme Court wei ym em laad i wow pynman yaka Public Hearing haka 19 tarik,” da ong chooh chooh u.

Hawa kylli, da ong u wa ha u Wisu (March) uni u snem da pyrchah ya i thmu wow tih moochuni naka thaaiñ, kawa da thmu wow tih hadooh 25 lak ton u mawchuni ha ka chi snem na ka 9 lak ton kamwa man katni.

“I pyrchah joor i ya ka Public Hearing yong ka Star Cement hajrong ka yurim wa daw ktah yaka thaaiñ waroh kawi khamtam ya ki 6 chnong wa kynthup ya ka Sonapyrdi, Kuliang, Borsora, Lumtongseng, Sakhri wa Shymplong,” da ong u President ka 6-Shnong u Womsar Talang.

Da pynbaad u leh wa i yap yong ki dohum ym toh de kawa ke wei da ktah ko leh hadooh 80% kiwa chong chnong kiwa im na ka wah Lukha na i daw wa ki karkhana pynmih khyndaw-bilat ha katai ka thaain da pynkylla rong ko ya katai ka wah.