15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1
Advertisement ad1

Angnood ka Salini Colony wow yoh i tipmit kam ka Dorbar Chnong

Advertisement ad1
Advertisement ad1
Advertisement ad1

Jowai: Ka Salini Colony kawi naki dong wa haap hapoh ka chnong Mihmyntdu da pynsñiaw ko yei angnood wow yoh i tipmit noh yaka kam ka Dorbar Chnong khnang wa ki paidbah u yoh myntoi ki nadooh u khoo rachon, i kreh 100 sngi, ki luti syngkeiñ, ki umbaam umdih wa kiwi kiwi ki Scheme sorkar.

Hei yaklam wa u waheh dong u Phermon Suchen, khana u wa hadooh katni ym pu em yoh ki kawon kawon ka Scheme yarap naka sorkar heiwa lada em iwon iwon i dawa wow pynbha pynmiat hapoh dong da hap bait u mih yakreh dei bor paidbah donhi.

Neitæ hei lai luti yong oo yow yoh yaka Scheme sorkar lyngba ka yung krehkaam u BDO Thadlaskeiñ leh sñiawthooh u wa toh neidaw wa dang man ki kam ka dong donhi kawa haap hapoh ka Mihmyntdu, na ini i daw ym ye ki u yoh pynkreh ya kawon kawon ka Scheme.

“Nadooh u snem 2017-18 yooluti i boi daw yoh neibhah ka chnong Mihmyntdu leh wym em ong ko wow pyndooh ya i, tangwa hadooh kattæ ym pu em yoh bynta i u kreh ya katæ ka Scheme 100 sngi, hanla da dep thap yei pyrtuid ki 70 ngut tam ki khon ka dong,” ong u Phermon Suchen.

Khana u wa nachwa haki snem wa dep da em hi wa yoh ki u pynkreh yaka Scheme chna paikhana kawa wan bait ha dong Salani Colony lyngba ka PHE, katwa ha kani ka kynti kawa da yoh neibynta wow pynchna namo Repair won ym em de lai ko haka dong lai noh ko lyngba ka chnong Mihmyntdu, wei i saam dang lai i chakhmat ya kiwa mih pyrtuid.

Neiliang u Secretary u W. Pohthmi khana u wa hapoh i pynlai u Waheh Chnong Mihmyntdu neipor chei por hawa man yalang da pynsñiaw ki yei eh wa i emkaam hapoh ka dong ka chnat, wei hapyrdi i pyrchang wei yooluti yong ki, ka chnong Mihmyntdu leh da ong hi ko daw pynyoh, tangwa kut i hei sahteiñ donhi.

“Kamwa da heh da krai katkam i sñiaw yong nga iwa miat hi, wa dei ya mynjur lang ka chnong Mihmyntdu toh u pynku kyrdan noh ya ki dong cha ki Dorbar Chnong tangwa u haap hi ko hapoh ka Mihmyntdu Pyllun, khnang wa ka roi ka paar leh u rap yoh u paidbah”. 

Ong haroh u wa man iwa eh du uwi donhi u Waheh Chnong wow pait u synchaar yaki 9 tylli ki dong  hapoh ka Mihmyntdu, na itæ i daw emkaam u pynboon ki Waheh Chnong khnang wa i roi i paar u nang ku ki hapoh ka Mihmyntdu. 

Share this:
Previous

Da em kiwa suba emkti wow pynyap yaka khynnah skur ha Sohkymphor: SP

Next

Chah ah ki dieñ wei pynkylla thaw rep saroo ki bru yaka khloo wa pait ka JHADC