U Pastor Chawas Thoo uwa man leh kam u Moderator ka Rymbai Presbytery da pynsñiaw u yei sñiawsih neidaw wa chah khanglaad u wow pynemkaam yei hok u kam uwa thap Vote ynnin ka 27 tarik neibynta ka Election MLA 2023.
U Pastor da ong u wa oo toh uwa chong chnong ka Rymbai wei ka thaw thap Vote u toh kawa em ha Iawpynsiñ wei chwa wow psiah u cha kani ka thaw da em wa beh oo heipor kamwa 11:00 waje hadooh 11:30 i step wei ym yoh laad u leh tang wow lai yieñ laiñ hanla oo da biang u leh ya ka EPIC Card.
Da khana u leh wa u bru wa beh oo toh uwa tip pyrtuid kam u Everest Ksih uwa na ka chnong Rymbai hi wei da beh ya oo khlem khana yei daw wei mar ya poi u hei thaw psiah chah beh wot u deiwa ong ya oo “Ym boi psiah de cheitai da biang.”
Kamtæ da ong u wa sñiawsih u neibhah oo wan u dei burom dei akor tangwa kopsar ym em de katæ ka Tip Bru Tip Blai, ka burom yei hok manbru wa ka hok wa da e da ka riti synchaar ka ri ha uwi pa uwi uwa chong chnong wa da em hok wow thap Vote.
Chooh chooh da ong u wa katwon sepai i lai yaseiñ kini ki bru neibhah kiwa beh oo toh kiwa baam Sacrament na kti yong oo hapoh yungmane Blai tangwa kini ki jooh ha kani ka sngi da beh ki oo iwa da pynsñiawsih wei pyndooh burom ya oo.
U Pastor da ong u wa ym em kwah u wow kdaw kti ya uwon uwon u kyrtong lane ka Party tangwa ini wa jia toh iwa sñiawsih hawa em kiwa leh kam ini i kaam.
