Ka sorkar jylla da pynbna ko wow chah biang ya ki warep ka jylla wow pynemkaam yei sboh dawai lane ka Fertilizer ha i thung i tep, wei daw e leh ya ka Subsidy kawa hadooh 50%. Ya kani ka rai ka sorkar da pyntip leh cha ki warep ka East Khasi Hills Farmers Cell kiwa da lai wow yachem wa u Symbood Montri Rangbah ha yung krehkaam u ynne ka sngi.
U Symbood Montri Rangbah, u Prestone Tynsong da ong u wa ini i rai yong ka sorkar toh hadien wa ka chnat da chem ko wa em i hiar hei pynmih ya ki mar rep kamba 40-50% nadooh wa da khang wow pynemkaam ya ka Fertilizer ha u snem 2014 yow wanrah ya ka Organic Farming næ ka rukom rep kawa khlem e dawai.
Da ong u wa chwa u snem 2014 ka sorkar da e laad ko wow rep da ki sboh dawai ya kiwa da pynpoi lyngba ka Ministry of Chemical and Fertilizers wow thung, tangwa hadien u snem 2014 wa dang synchaar ka Congress da pyndooh noh yei pynemkaam ya ka Fertilizer hei pyrtuid ka Organic Mission.
U Prestone da ong u wa man iwa bha wow pynkrehkaam da ka Organic Farming, tangwa i mih i eh won ya ki warep neibhah da chem wa da hiar kamwa 40-50% i pynmih ya ki mar rep, wei da pynrap u wa ka sorkar ym pynchlur ware ko ya ka Fertilizer tangwa i hiar i yoh i kot iwa ye u pynmih ki warep ym yohsa de wow hap pyrkhat leh iyi wow jia ya ki warep.
U Symbood Montri Rangbah da ong u wa ha ka tayaw wow wan neiliang ka sorkar daw lai ko cha Delhi wow yaklam wa ka Ministry hajrong ini neibynta wow kyntu ya ka yoh ka kot wei wow kyntu ya i kaam rep. Da khana u wa ka sorkar da pynmih ko ya iwi i pynbna ha ka 9 tarik uni u bnai yow pyndam ya ka hukum wa khang yow pynemkaam dawai ha ki kaam rep. Da khana chooh chooh u wa ka sorkar jylla daw kyrpaad ko ya ka Ministry wow e biang yei bhah dawai cha ka MECOFED, wei ka Subsidy na ka sorkar jylla daw su 50% wei ya kani daw pynmih pynbna ha ka tayaw wow wan da ka Department of Corporation.
