U Chairman ka Disciplinary Committee yong ka NPP, u Macmilan Byrsat da pyntip u wa em uwi u MLA uwa da leh pyrchah ya ka Party, tangwa da kyntait u wow khana yei pyrtuid uni u MLA neibhah wa dang paan ka Party yei pynche.
Da ong u wa ka Party da phah ko ya uni u MLA hapoh i bichaar yong ka Disciplinary Committee heiwa da paan leh yei pynche (Show Cause), neibhah wa ka Party kwah ko wow em i lai bait lai ryntih.
Hawa kylli, da ong u wa i bichaar ya uni u MLA toh katkam ka ujor wa ka Party da yoh ko, neibhah em ki khep wa klam pyrchah næ yaleh pyrchah ya ka Party wei daw e laad ya oo wow jubab, deiwa pynrap wa lada ka Party sñiawyahaap ko ya ka jubab daw pdiang ko wei lada ym yahaap daw chim ko da kiwi ki laad.
Heijooh i por uni u heh ka NPP da ong u wa i paan pynche na uni u MLA toh hajrong ka yurim wa klam u wei leh u pyrchah ya ka Party haka MDC Election, deiwa pynrap wa ym em ki MLA wa kwah wow mih na ka Party.
U Macmilan uwa man leh u MLA ka Nongstoin da klam skem u wa ym em uwi wot leh u MLA ka NPP u wow mih, tangwa da ong u wa ki MLA na kiwi ki Party em ki wow wan noh cha ka NPP, wei da ong leh wa i kam yong kiwi ki Party wow mih ki MLA ka NPP toh wow pynthame donhi.
