U bomb wa tip kam u Improvised Explosive Device (IED) wa khia kamwa 7 Kg da chem ya oo na i thaw wa em ka karkhana M/s Meghalaya Coke kawa dang chna katni ha chong Bther, EJH haka 16 tarik uni u bnai.
Ya uni u bom IED da suba wa da em wa booh oo haka miet ka 15 tarik lane ha i step synyaw ka 16 tatik. U chowkidar kani ka thaw da yoo u ya ki sainar (Electric Wires) heipor 6 waje i step ka 16 tarik wei da pyntip ya ini cha ki pulit.
Hadien wa yoh ya ini u yutip, ki pulit naka Umpleng AD Camp da lai ki cha kani ka thaw wei da phah mih lut ya ki bru wa em wei da wan ki Bomb Squad na Police Headquarters, Shillong yow tympra ya uni u bom IED pyn ha ini i thaw. Da thooh leh ya kani ka thaw deiwa pynemkaam da ki ksaw pulit yow chem ya ki sabut. Da chem katkam ka takit wa da pynemkaam da ki Gelatine kiwa pynemkaam yow pynpdung thaw hawa tih moochuni ha kani ka thaaiñ yow pynman kam u bom. Kiwa tam na uni u bom da phah cha ka Forensic Science Laboratory yow yoh yaka yutip wa tikna.
Ki pulit da pyntip ki wa da em ka mukotduma wa da yaleh haka Meghalaya High Court da u Dame Wanhi Rymbai wa kiwi heiwa haka 22-11-2019 da khang wow chna ya kani ka Coke Oven Plant. Tangwa ka High Court da pyndam ko ya kani ka hukum haka 15 tarik uni u bnai hi. Kamtæ da ong wa yei u man wa ini da jia i neidaw wa em i yachoon para ki bru wa em ha kani ka thaw hi. Hanlada kattæ leh ki pulit da pynman ki yaka takit na waroh ki liang wei ha ini i jia ym em wa mynsoo wei chah ktah ki thaw ki bhaw.
Discussion about this post