Chah dait ksaw u Coach ka Kenya wa ka Coach ka Japan ha Delhi | Chah pynbaad ki bru wa maya ksaw

U Sprint Coach ka Kenya, u Dennis Mwanzo wa ka Assistant Coach ka Japan, ka Mieko Okumatsu kiwa em ha New Delhi kattæ neibynta 12th World Para Athletics Championships, da chah dait ki ha ki ksaw yaaw ha ka Warm-up Track ka Jawaharlal Nehru Stadium hei step ka sngi Thohdieñ. Ini da jia i wot hadien wa ka Supreme Court ka India ha u Naisaphra da pynmih ko ar tylli ki hukum heiyatoh wa ki ksaw wa khlem tre wa em ha ka thaaiñ nongbah ka ri.

U Doctor kiwa yalehke ka Kenya, u Michael Okaro da khana u wa ini da jia i heipor 9:30 i step heiwa da kit wut-wut ya u Dennis cha Safdarjung Hospital yow yoh u yei Inject dawai Rabies. Deiwa pynrap u wa kam ha kani ka rynsan World Championship dang jia kamni man i iwa khuslai bha.

Heipor wa jia ini, u Dennis dang pynkhreh u ya ki Starting Blocks kam wow pynkhreh ya ka e sikai yei phet 200-metre ya ka Stacey Obonyo tangwa da wan uwi u ksaw uwa da dait ya uni u Coach na ka khawah timun u.

Katkam ka yukhieñ ha Delhi da em hadooh 25,210 sien i chah dait ksaw ki bru du ha u snem 2024, iwa ku na 17,847 sien ha u snem wa dep wei ha u bnai wa nyngkong uni u snem da em 3,200 sien i chah dait ksaw ha Delhi. Da antaad leh wa ha Delhi da em hadooh 8 lak tylli ki ksaw wa khlem tre.

Related posts

Baam lut i diñ yei yung wa em ha Wahiajer

October 4, 2025

Pynkylla ka sorkar ya ka kuna ki kari wym em FASTag

October 4, 2025

Neiliang ka Organising Committee kani ka IndianOil World Para Athletics Championships 2025, da pynbaad ki ya ki bru wa wan e baam ya kini ki ksaw wa em hajan kani ka Stadium.

Ka Mieko Okumatsu kawa man kam ka Assistant Coach ka Japan yong ka Intellectually Impaired Team, da chah dait ko ha ka jooh ka step wei da lai ko nei maa deiwa yarap ki bru ka chnat i chait i khiah kiwa da wan wow e sumaar ya ka.

U Coach ka Kenya da khana u wa heipor wa chah dait u da mut u jan em wa ksoh oo tangwa manda kyruiñ u da yoo u ya u ksaw rong lieh rong rong wa dait oo wei da hap u wow dat oo yow lait u.

Kiwa pynman ya kani ka lympung dadep ki wow thoh cha ka Municipal Corporation of Delhi (MCD) wow yada ya kani ka Jawaharlal Nehru Stadium heiwa da kyrriah ya ki ksaw wa em chajan tangwa kattæ leh da em kiwa wan wow e baam ya kini ki ksaw ha ini i thaw.