Ha ka 5 tarik uni u bnai da em 4 ngut kiwa na ka chnong Hawai Sutnga kiwa da chah dat ha ki 5 ngut ki bru kiwa na ka chnong Lakroh kiwa da tip pyrtuid kam u Panon Tati, u Akon Tati, u Sisu Tati, u Butang Das wa uwi uwa tip kam u John katkam ka FIR wa da booh da u waheh chnong ka Hawai Sutnga heiwa da ong leh wa da emktilang wa kiwi ki wym pu tip pyrtuid kiwa na chnong Lakroh hi kiwa man ki chnong wa dang haap hapoh ka Amlarem Sub-Division.
Ini da jia i heipor kamwa 5:45 i janmiet heipor wa em ki kattu katni kiwa na Hawai Sutnga dang liwan chnong ki na Muktapur hadien wa wan yalehbol wei manda poi ha ka yingkieñ Lakroh da em ki bru wa yang ki da ka kari wa em Number WB-02U-4238 kawa da sangeh hapyrdi sarok yow khang luti.
Hadien kattu katni por, kini ki bru da sdang ki wow dat da ki tiar pynmynsoo hadooh wa hap kit ki cha Pdengshakap PHC yow yoh sumaar.
U waheh chnong da pyntip u wa oo leh da mut u wow chah dat katwa u Secretary chnong won da mynsoo u wei da pynkit noh cha Hospital yow chah sumaar.
Hajrong ini wa jia neiliang ka seiñ WJSU hei yahkhmat u General Secretary, u Everest Langstang, u Vice President, u Heartcasing Dkhar wa ki dkhot ka KSU War Jaiñtia Circle, u Platini Mukhim kam u General Secretary neitæ ka seiñ HYC War Jaiñtia Circle hei yahkhmat u President, u Yodahunki Shylla chirup ka JSU Syndai Unit hadien wa kyrpaad kiwa chah dat, ynne da lai hiar yachem ki wa ki bor pulit ka Muktapur Police Patrol Post.
Ha ini i yachem, neilang u In-Charge ka Muktapur PPP da pyntip u wa ka takit dang lai ko chakhmat wei ym pu em kem ya kiwon kiwon wei ya ka FIR leh da booh.
Ki seiñ da kyntu ki ya ki pulit wow kem smat ya kiwa emkti neibhah wa kini ki bru toh ki dkhar yow lait kani ka kaam wow kylla chei kynaad sñiaw yaphær jaitbru yow lait leh u chah ktah i chongsuk chongsaaiñ.
Discussion about this post