Hadien wa ka VPP da e FIR ko pyrchah ya Donkupar Sumer uwa man leh u MDC warim ka Umsning haka 15 tarik uni u bnai, ynnin won neiliang u Donkupar da e FIR kylla u pyrchah ya u Ardent M Basaiawmoit deiwa pynbaad wa baam tooh u yaka poisa wei da chna thok u ya ki kot ki sla.
Ha ka FIR da ong wa heipor wa u Ardent man u kam u CEM ka KHADC da pynemkaam bakla u yaka poisa paidbah deiwa kam wow thied thaw neibynta ka Council wei u Donkupar ha itu i por man u leh kam u Executive Member iwa da pynman ya oo wow tip u chaphang ini waroh wei da biang u leh ya ki sabut nadooh ki kot ki sla.
Da ong u wa u Ardent ym em yoh bor u na ki EM wow leh yaka “Sales Deed” wei kani ka Sales Deed leh ym em Register ka wei da soi donhi u yaka kot kawa ym em bor yow pynbiej paidbah wei kani ka poisa kawa Rs. 35,25,039 da sai u ka cha oo napoh ka Account ka Council.
Chooh chooh da ong u wa ka kot wa soi u Ardent toh ka Non-Judicial Paper kawa Rs. 10 i dor wei ya kani ka Sales Deed ym em Register ka wei ym em su yaka Stamp Duty, kamtæ kani ka kot toh ka wym ye u yieñ hakhmat ka aiñ wei da soi u ka du wow yoh u sai yaka poisa.
Kamtæ da ong u wa na ini i daw hadooh katni ym ye ka KHADC wow kamtre ya ini i thaw wei da hap ko wow pynkrehkaam yei yung krehkaam ko na i thaw wa chim wai. Wei ini i leh thok u Ardent da che chooh chooh haka Notice wa da pynmih haka 15-07-22 wa da phah da ka Council yow leh sorjamin (Survey) heiwa u tre thaw u Nolipstar Lyngdoh uwa da soi Sales Deed wa u Ardent da ong u wa ymem yoh u yaka poisa kamwa da kular cha oo, wei hajrong ini ym ye u wow e kti yei thaw.
Ka FIR da ong ko leh wa yow sai tooh chooh chooh yaka poisa, da beh u ya 7 ngut ki bru wakreh deiwa e daw wym em poisa ka Council tangwa hadien ini da thung u 12 ngut da ki bru yong oo hi.
Hajrong ini waroh da kyntu ya ki pulit wym toh u e laad wow lai laitlooid u Ardent hadien wa leh ya kini ki kaam thok deiwa pynngat oo hapoh ka kyndon 379,420,465 wa 403.
Discussion about this post