Uwa yahkhmat ka NPP na Garo Hills uwa tip kam u Kritenberth R Marak da chah ujor FIR u ynnin ka sngi haka Jaynie Sangma deiwa ong wa chim kabu u ya u payu ar bei ko uwa duna hei bor pyrkhat uwa tip kam u Milam N Sangma.
Ha ka ujor wa da e ha u OC ka Tura Police Station, da ong wa u Kritenberth da riñ Video u ya u Milam yow pynmuja ya idæ haka 18 tarik uni u bnai wei da pyndeiñ u oo waka Scarf ka NPP yow pynyoo wa kyrchaan u ya kani ka Party khlem da yoh bor.
Ini i Video toh iwa da poor bha ha ki Social Media heiwa u Kritenberth da beiñ u ya kiwa kyrchaan yaka Congress.
Ka FIR da ong ko wa u Milam neidaw wa man u u bru wa rap duna hei bor pyrkhat ym tip u iyi thmu u Kritenberth uwa da pynemkaam ya oo heipor wa em ka Election chi sngi chwa wow thap Vote wei da man ko leh pyrchah yaka Model Code of Conduct.
Da ong leh wa ini wa da jia pyrchah ya u bru wa em i duna hei bor pyrkhat man ko pyrchah ya ki kyndon ka aiñ Rights of Persons with Disabilities Act, 2016 khamtam ka kyndon Section 7 (2) kawa da khang wow chim kabu ya ki bru kam ini i rukom.
Ha ini i Video da sñiaw yeiwa ong u Kritenbirth, “U Milam toh uwa chi boo chi kong u Saleng uwa da wan-ke cha nga wei u kylli O ya oo chei yi u thap mi? Ooh cha ka kot. Kayi ka kot? Agatha, Agatha, biang bha.”
Ka Jaynie da ong ko wa u Milam toh u diah khian ka Tracy N Sangma, ka kurim warim u Saleng N Sangma, u kyrtong MP ka Congress uwa yakhun pyrchah yaka kyrtong ka NPP na Tura, ka Agatha Sangma.
Chooh chooh da ong ka Jaynie wa ini toh iwa da jia heipor wa krehkaam ka Model Code of Conduct tangwa u Returning Officer kamjooh u Chief Electoral Officer ka Meghalaya ym em leh ki iyi iyi.
Discussion about this post