Ki ar tylli ki seiñbhalang wa kynthup ya ka JYF-EJH wa ka HYC-EJC da lai pait ki ya ki skur ha kylleiñ ki chnong ka East Jaiñtia Hills heiwa da chem ki ya kiwa boon ki duna nadooh i jæd i pra ki skur, i duna kiwa sikai katkam i boon ki khynnah skur, wa i eh i khoo wa chem ki skur liang wanang.
Ki ar seiñ da ong ki wa dei langær jooh sñiaw ki wa ka sorkar angnood ko wow pynku ya i stat i tip ha ka jylla wei yeini da ong da ki montri ka sorkar wei ini da e mynsien i ya ki manbei manpa wa ki paidbah kamjooh, tangwa ki ar seiñ da sñiawsih wei da diaw mynsien ki wow sakhi yei man i long ki skur kiwa da jæd da pai neibhah wa kiwa pait ya ki ym johbor ki wow pynmiat ya ki.
Kawi na kam kini ki skur toh ka Suchen Dhana LP School kawa em ha Suchen Dhana kawa da pra phrai wei kamwa man kattæ ym yoodur de wow ye u pynemkaam ya ka khamtam ha i ly’ur.
Ya kani ka yung skur da chna nadooh u snem 2008 kawa em ki khynnah kiwa ym duna ya sanphaw ngut ha ki Class wa nadooh Nursery hadooh Class V tangwa ym rap em u yarap ka sorkar ya ka khamtam ya ki yung wa ki kamra kani ka skur.
Kamtæ ki ar seiñ da kyntu ki ya ka sorkar wow kyruiñ leh cha ki khynnah kani ka chnong khnang wow yoh ki i stat i tip kam kiwi tawon ki khynnah ha jylla kiwa em i jooh i rta kam ki.